13 އަހަރުގެ ކުއްޖާ މަރައިލި މައްސަލަ: ދެ މީހަކަށް ދައުވާ ކުރަނީ
ހުޅުމާލޭ ދެވަނަ ފިޔަވަހީގައި މަރައިލި އުމުރުން 13 އަހަރުގެ ކުއްޖާގެ މައްސަލައިގައި ދެ މީހަކަށް ދައުވާ ކުރަން ފަށައިފިއެވެ.
މިހާރު ކުރިއަށްދާ ނޫސްވެރިންގެ ބައްދަލުވުމުގައި ޕްރޮސެކިއުޓާ ޖެނެރަލް (ޕީޖީ) ވިދާޅުވީ އެ މައްސަލައިގައި ދެ މީހަކަށް ދައުވާ ކުރަން ކުރިމިނަލް ކޯޓަށް ފޮނަވަން ނިންމާފައިވާކަމަށް ވިދާޅުވެފައެވެ.
ޕީޖީ ޝަމީމް ވިދާޅުވީ އެ މައްސަލައާ ގުޅިގެން ހައްޔަރުކޮށްފައިވާ 27 އަހަރުގެ ފިރިހެނާ އަދި 17 އަހަރު ކުއްޖާގެ މައްޗަށް ދައުވާ އުފުލަން ނިންމައިފައިވާ ކަމަށެވެ.
އެމީހުންގެ ތެރެއިން އުމުރުން 27 އަހަރުގެ އިބްރާހިމް ޒިހާން، ބަގީޗާގެ، ނ. ލަންދޫ މައްޗަށް ހަތް ބާވަތެއްގެ 13 ދައުވާއެއް ކުރަން ނިންމާފައިވާކަމަށް ޕީޖީ ޝަމީމް ވިދާޅުވިއެވެ.
އެ ބައްދަލުވުމުގައި ޕީޖީ ޝަމީމް އިތުރަށް ވިދާޅުވީ މިއީ ވަރަށް "އެހެން ކަހަލަ" މައްސަލައެއް ކަމަށާއި މި މައްސަލައިގައި ތުހުމަތު ކުރެވޭ ޒިހާންގެ މައްޗަށް 100 އަހަރު ދުވަހުގެ ޖަލު ހުކުމެއް ވެސް އައިސްފާނެ ކަމަށެވެ.
މި ދައުވާތަކުގެ އިތުރުން އެހެން ދެ ދައުވާއެއް ޒިހާންގެ މައްޗަށް ކުރަން ނިންމާފައިވާކަމަށް ވެސް ޕީޖީ ޝަމީމް ވިދާޅުވިއެވެ.
ނަމަވެސް އެއީ އެހެން މައްސަލައަކާ ގުޅިގެން ކުރާ ދައުވާތަކެއްކަމަށް ޕީޖީ ޝަމީމް ވިދާޅުވިއެވެ.
