ސަލްމާން މިސްކިތް ހުޅުވުމުގެ މަޝްވަރާއަށް ސައުދީން ވަފްދެއް ވަޑައިގެންފި
ސައުދީ ސަރުކާރުގެ ހިލޭ އެހީގެ ދަށުން ރައީސް ޔާމީންގެ ސަރުކާރުން މާލޭގައި ބިނާ ކުރި، ސަލްމާން ރަސްގެފާނު މިސްކިތް ހުޅުވުމުގެ މަޝްވަރާއަށް ސައުދީގެ ވަފްދެއް ރާއްޖެ ވަޑައިގެންފިއެވެ.
މިކަމާ ގުޅޭގޮތުން ރައީސް އޮފީހުގެ ތަރުޖަމާނު މަބްރޫކް ޢަބްދުލްއަޒީޒު މިއަދު ވިދާޅުވީ ސައުދީގެ އެ ވަފްދު މިހާރު ރާއްޖެ ވަޑައިގެންފައިވާ ކަމަށާއި ނަމަވެސް ސަލްމާން މިސްކިތް ހުޅުވުމުގެ މަޝްވަރާތައް ފައްޓަވާނީ މާދަމާ ކަމަށެވެ.
މި ވަފްދުގައި އެންމެ އިސްކޮށް އުޅުއްވާނީ ސައުދީގެ އިސްލާމިކް އެފެއަރޒްގެ އަންޑަރ ސެކެޓްރީ އައްވާދު ސަބްތީއެވެ. މި ވަފުދާއި ދިވެހި ސަރުކާރުގެ ފަރާތުން ބައްދަލުކުރާ ސްޓޭކް ހޯލްޑަރުންނަކީ ފޮރިން މިނިސްޓްރީ، އިސްލާމިކް މިނިސްޓްރީ، ޕްލޭނިންގ މިނިސްޓްރީގެ އިތުރުން ރައީސް އޮފީހުގެ ފޮރިން ރިލޭޝަންސް އޮފީހެވެ.
މި މިސްކިތަކީ ސައުދީ އަރަބިއްޔާގެ ރަސްގެފާނުގެ އެހީގައި ހަދައިފައިވާ މިސްކިތެކެވެ.
ސަލްމާން މިސްކިތް އިމާރާތްކުރުމުގެ މަސައްކަތުގައި ކުރީގެ ސަރުކާރުން ސޮއި ކޮށްފައި ވަނީ 2017 ވަނަ އަހަރުގެ ފެބްރުއަރީ މަހުގެ 28 ވަނަ ދުވަހުގައެވެ.
ސަލްމާން މިސްކިތުގެ މަސައްކަތް މިދިޔަ އަހަރު ނިމި ސަރުކާރާ ހަވާލުކުރިކަމުގައި ވީނަމަވެސް މިސްކިތް އަދި އަދާ ޖެހެންދެން ވެސް ހުޅުވިފައެއް ނުވެއެވެ.
