އިއުތިރާފުވާ މީހާއަށް ދައުވާ ނުކުރުމުގެ ބާރެއް ނެތް: ހައިލަމް
އިއުތިރާފުގެ އެއްބަސްވުމަކީ އިއުތިރާފުވާ މީހާއާ ދެކޮޅަށް އެއްވެސް ދައުވާއެއް ނުކޮށް ލީގަލް އިމިއުނިޓީ ދިނުމުގެ ބާރު ގާނޫނުން ޕްރޮސެކިއުޓަރު ޖެނެރަލް (ޕީޖީ)އަށް ލިބިދެވޭ މަފްހޫމެއް ނޫން ކަމަށް ކްރިމިނަލް ކޯޓުގެ ކުރީގެ އިސް ގާޒީ އަހުމަދު ހައިލަމް މިއަދު ވިދާޅުވެއްޖެއެވެ.
ހައިލަމް މިހެން ވިދާޅުވީ އެމްއެމްޕީއާރްސީގެ ބޮޑު ހިޔާނާތުގައި ހިމެނޭ އެސްއޯއެފް ކުންފުންޏަށް ދައުވާ ނުކުރަން މިއަދު ސުޕްރީމް ކޯޓްގައި އޮތް ރައީސް ޔާމީންގެ އިސްތިއުނާފީ މައްސަލައިގައި ދައުލަތުން ހާމަ ކުރުމުންނެވެ.
މިކަމާ ބެހޭގޮތުން ކުރީގެ ފަނޑިޔާރު ހައިލަމް ވިދާޅުވީ، އިއުތިރާފުގެ އެއްބަސްވުމަކީ އިއުތިރާފުވާ މީހާއާ ދެކޮޅަށް އެއްވެސް ދައުވާއެއް ނުކޮށް ލީގަލް އިމިއުނިޓީ ދިނުމުގެ ބާރު ގާނޫނުން ޕީޖީއަށް ލިބިދެވޭ މަފްހޫމެއް ނޫން ކަމަށާއި އިއުތިރާފުގެ އެއްބަސްވުން ހެދޭނީ ހަމަ އެކަނި ވަކި ދައުވާއެއް ކުރުމަށް ނުވަތަ ކޮށްފައިވާ ބައެއް ދައުވާތައް އަނބުރާ ގެނައުމަށް ނުވަތަ ކުށުގެ އަދަބު ލުއި ކޮށްދިނުމަށް ކަމަށެވެ.
"މީހަކާ ދެކޮޅަށް ތަހުގީގުގައި ހެކި ލިބިފައިވުމަކީ އެމީހާ އަތުގައި އެހެން މީހަކާ ދެކޮޅަށް ހުރި ހެކި ބޭނުންކޮށްގެން އިއުތިރާފުގެ އެއްބަސްވުމެއްގެ ތެރެއިން ލީގަލް އިމިއުނިޓީ ހޯދޭނެ ކަމެއްް ނޫން. އިއުތިރާފުގެ އެއްބަސްވުމަކީ ތުހުމަތުކުރެވޭ މީހާ އިސްލާހުވުމަށް ފުރުސަތު ދިނުމުގެ ގޮތުން ގާނޫނުގައި ބަޔާންކުރެވިފައިވާ ބާބެއް،" ހައިލަމް ވިދާޅުވިއެވެ.
ސުޕްރީމް ކޯޓުގައި މިއަދު ކުރިއަށް ދިޔަ ރައީސް ޔާމީންގެ ޝަރީޢަތުގައި، ފަނޑިޔާރުންގެ ބެންޗުގައި ހިމެނިވަޑައިގަންނަވާ ފަނޑިޔާރު ޑރ. އަޒްމިރަލްދާ ޒާހިރު ، އެސްއޯއެފާ ގުޅޭ ގޮތުން ތަހުގީގެއް ހިންގުނުތޯއާއި އެ ކުންފުންޏާއި އެ ކުންފުނީގައި ޝާމިލުވާ ފަރާތްތަކުގެ މައްޗަށް ދައުވާކޮށްފައިވޭތޯ ސުވާލު ކުރައްވައިފައި ވެއެވެ. އެ ސުވާލުގެ ޖަވާބު ދެއްވަމުން ދައުލަތުގެ ވަކީލު އަހުމަދު ނައުފަލް ވިދާޅުވީ، އެމްއެންޕީއާރުސީގެ ޚިޔާނާތުގެ ފައިސާތައް ހޯދުމަކީ މުހިންމު ކަމަކަށް ވާއިރު، އެ ފައިސާތައް ހޯދެން އޮތީ އެސްއޯއެފްގެ މީހުން ދޭ ހެކިބަހުގެ މައްޗަށް ކަމަށްވާތީ އެ މީހުންގެ މައްޗަށް ދައުވާ ނުކުރަން ނިންމައިފައިވާ ކަމަށެވެ. އަދި ވިދާޅުވީ، އެސްއޯއެފްއަކީ އެމްއެމްޕީއާރުސީގެ ފައިސާ ލޯންޑާކުރަން ބޭނުންކުރި ވެހިކަލެއް ކަމަށެވެ.
އެމީހުންގެ މައްޗަށް ތަޙްޤީޤެއް ހިންގުނުތޯ ކުރިމަތި ކުރި ސުވާލަށް ޖަވާބު ދެއްވަމުން ދައުލަތުން ވިދާޅުވީ، މައްސަލައިގެ ތަހުގީގު ފެށުނުއިރު އެ ކުންފުނީގައި ޝާމިލުވާ ފަރާތްތައް ރާއްޖޭގައި ނެތުމުން އެ ފަރާތްތަކާ އެއިރު ތަހުގީގުގައި ސުވާލުކުރެވިފައި ނުވާ ކަމަށެވެ. ނަމަވެސް ފަހުން އެފަރާތްތަކުގެ އެއްބާރުލުން ބޭނުންވާތީ ސުވާލު ކުރެވުނު ކަމަށް ވެސް ވިދާޅުވިއެވެ.
އެސްއޯއެފްގައި އިސްކޮށް ހަރަކާތްތެރިވި ތިން ފަރާތެއް ހޯދުމަށް މީގެ ކުރިން ވަނީ ރެޑް ނޯޓިސް ވެސް ނެރެފައެވެ. އެހެން ނަމަވެސް ފަހުން ވަނީ އެ ނޯޓިސް ބާތިލްކޮށްފައެވެ. ރެޑް ނޯޓިސް ނެރެފައި ވަނީ، މުޙައްމަދު އައްލާމް ލަތީފާއި އަޙްމަދު އިސްފާޙް އަލީ އަދި މުޙައްމަދު ހުސެއިން (އޮއިއްޓޭ)ގެ މައްޗަށެވެ. މި މީހުން އަދިވެސް ދިރިއުޅެމުންދަނީ ރާއްޖެއިން ބޭރުގައެވެ.
