އޯލެވެލް އިމްތިހާނު ތާވަލާ އެއްގޮތަށް އޮންނާނެ: އެޑިއުކޭޝަން މިނިސްޓަރު
ކޮވިޑް-19އާ ގުޅިގެން މެއި/ޖޫން އަށް ފަސްކޮށްފައިވާ ކެމްބްރިޖް އޯލެވެލް އިމްތިހާނު ތާވަލާ އެއްގޮތަށް އޮންނާނެ ކަމަށް އެޑިއުކޭޝަން މިނިސްޓަރު ޑރ.އައިޝަތު އަލީ ވިދާޅުވެއްޖެއެވެ.
މިނިސްޓަރު މިހެން ވިދާޅުވީ އޭލެވެލް އިމްތިހާނު ކުރިއަށް ގެންދާ އެޑެކްސެލް އިން އެ އިމްތިހާނު މެއި/ޖޫން ގައި ކުރިއަށް ނުގެންދިއުމަށް ނިންމާފައި ވަނިކޮށް، އޯލެވެލް އިމްތިހާނު ކުރިއަށް ގެންދޭތޯ އާންމުން ސުވާލު ކުރައްވަމުން ގެންދާ ދަނޑިވަޅެއްގައެވެ.
އާންމު ރައްޔިތަކު މެއި/ޖޫންގައި އޯލެވެލް އިމްތިހާނު ހަދާ ކުދިންނަށް ވާންވީ ގޮތެއް ސާފު ކޮށްދިނުމަށް އެދި ކޮށްފައިވާ ޓްވީޓަކަށް ރިޕްލައި ކުރައްވާ އެޑިއުކޭޝަން މިިނިސްޓަރު އާއިޝަތު އަލީ ވިދާޅުވީ އަދި ކެމްބްރިޖް އޯލެވެލް އިމްތިހާނަށް ބަދަލު އައިސްފައިވާ ކަމަކަށް ނާންގަވާ ކަމަށެވެ.
އޯލެވެލް އިމްތިހާނު މެއި/ޖޫންގައި ބޭއްވުމަށް ނިންމާފައިވާއިރު، ހުރިހާ ސުކޫލްތަކަކުން ވެސް ދަނީ އިމްތިހާނަށް ދަރިވަރުން ތައްޔާރު ކުރުމުގެ މަސައްކަތް ކުރަމުންނެވެ.
