ނަދީމްގެ މަރުގެ މައްސަލަ: ހުލާސާ ބަޔާން އިއްވުން ނޮވެމްބަރު މަހު
2017ވަނަ އަހަރުގެ ޖުލައި މަހު މާލޭގެ ޓާމިނަލް ކެފޭ ތެރޭގައި މަރައިލި ހއ. ތަކަންދޫ/ އިބްރާހިމީހިޔާ ނަދީމް އަބްދުއްރަހީމްގެ މަރުގެ މައްސަލައިގެ ޝަރީއަތުގައި ދެ ފަރާތުން ހެކި ބަހާ ގުޅޭ ގޮތުން ވާހަކަ ދައްކައި މިއަދު ނިންމައިލައިފިއެވެ.
ނަދީމުގެ މަރުގެ މައްސަލައިގައި ދައުވާ އުފުލައިފައި ވަނީ ގއ. ގެމަނަފުށި/ ހަވާސް މުހައްމަދު ކަރަމް ސުހައިލާއި، ރ. އިންނަމާދޫ/ ސަމަންތާ ހުސައިން ޝާމިނާއި، ލ. ގަން/ ވިދާތަރި އަލީ ނިފާޒާއި އަދި ގ. ޝާރާޒް މުހައްމަދު މަފާޒްގެ މައްޗަށެވެ.
އޭގެ ތެރެއިން މަފާޒްގެ މައްޗަށް ކޮށްފައި ވަނީ ތޫނު އެއްޗެއް ބޭނުންކޮށްގެން ގަސްދުގައި މީހަކު މެރުމުގެ ދައުވާއެވެ. އަނެއް ތިން މީހުންގެ މައްޗަށް ދައުވާކޮށްފައި ވަނީ ތޫނު އެއްޗެއް ބޭނުންކޮށްގެން ގަސްދުގައި މީހަކު މެރުމުގައި ބައިވެރިވިކަމުގެ ދައުވާއެވެ.
ހުކުމަކާ ހަމައަށް އައިސްފައިވާ މި މައްސަލައިގެ ހުލާސާ ބަޔާން އިއްވުން ތާވަލުކޮށްފައި ވަނީ އަންނަ ނޮވެމްބަރު މަހުގެ 15އަށް ކަމަށް ކްރިމިނަލް ކޯޓުގެ ގާޒީ ހުސެއިން ފާއިޒް ރަޝާދު ވިދާޅުވެފައިވެއެވެ.
މިއަދުގެ އަޑުއެހުމުގައި ދިފާއުން ވަނީ ހެއްކާ ބެހޭގޮތުން ގިނަ ވާހަކަތަކެއް ދައްކައިފައެވެ. އެގޮތުން ދައުވާ ލިބޭ ހަތަރު މީހުންގެ ދިފާއީ ވަކީލް ނޫރުލްސަލާމް ވަނީ އެ ހަތަރު މީހުންގެ މައްޗަށް އެ ދައުވާ ނުއުފުލޭނެ ކަމަށް ހެކީގެ ހެކިބަހުން ސާބިތުވާކަމަށް ވެސް ވިދާޅުވެފައެވެ.
