އެއް މިލިއަން ޓޫރިސްޓުންގެ ޓާގެޓަށް މިމަސް ނިމޭއިރު ވާސިލް ވެވޭނެ: މިނިސްޓަރ
ރާއްޖެއަށް އެއް މިލިއަން ޓޫރިސްޓުން ގެނައުމުގެ ޓާގެޓަށް މި ހިނގާ އޮކްޓޯބަރު މަސް ނިމޭއިރު ވާސިލް ވެވޭނެކަމުގެ އުއްމީދު ވަރަށް ބޮޑުކަމަށް ޓޫރިޒަމް މިނިސްޓަރ އަބްދުﷲ މައުސޫމް ވިދާޅުވެއްޖެއެވެ.
މިނިސްޓަރ މައުސޫމް މިރޭ ކުރެއްވި ޓްވީޓެއްގައި ވިދާޅުވީ މިއަހަރު ނިމުނުގެ ކުރިން ރާއްޖެއަށް 1.3 މިލިއަން ޓޫރިސްޓުން ގެނައުމުގެ އުއްމީދު ވެސް އައު ވެފައިވާ ކަމަށެވެ.
"2021ވަނަ އަހަރު ރާއްޖެއަށް އެއް މިލިއަން ޓޫރިސްޓުން ގެނައުމަށް ކުރި ޓާގެޓު މި އޮކްޓޯބަރު ނިމޭ އިރު ހާސިލް ވާނެ ކަމުގެ އުއްމީދު ވަރަށް ބޮޑު. މިއާ އެކު މި އަހަރު ނިމެންވާއިރު 1.3 މިލިއަން ޓޫރިސްޓުން ގެނައުމުގެ އުއްމީދު އިރާދަކުރެއްވިއްޔާ ހާސިލްވާނެ" މިނިސްޓަރ ވިދާޅުވިއެވެ.
ކޮވިޑް-19ގެ ސަބަބުން ރާއްޖޭގެ ފަތުރުވެރިކަމަށް ބޮޑު އަސަރެއް ކޮށްފައިވާ ނަމަވެސް ރާއްޖޭގެ ފަތުރުވެރިކަމުގެ ހާލަތު މިހާރު މަޑުމަޑުން އަންނަނީ ރަނގަޅުވަމުންނެވެ. އަދި ރާއްޖެއަށް އެއްމިލިއަން ޓޫރިސްޓުންް އައުމަކީ މިއީ ރާއްޖޭގެ ފަތުރުވެރިކަމަށް ލިބޭނެ ބޮޑު ކާމިޔާބެކެވެ.
ރާއްޖޭގެ އިގްތިސާދުގެ މައިގަނޑު ކަމުގައިވާ ފަތުރުވެރިކަން ރަނގަޅުކުރުމުގެ ގޮތުން ބައިނަލް އަގުވާމީ މާކެޓަށް ރާއްޖެ އިޝްތިހާރު ކުރުމަށް ޓަކައި ޓޫރިޒަމް މިނިސްޓްރީން ދަނީ ބައިނަލްއަގުވާމީ ތަފާތު ކެމްޕެއިންތައް ހިނގަމުންނެވެ.
