ކީރިތި ޤުރްއާނާ ބެހޭ ވަޤުފު އިމާރާތް 'ދާރުއްނޫރު' އިފްތިތާހުކޮށްފި
ކީރިތި ގުރްއާނުގެ ދާއިރާ ކުރިއެރުވުމަށް އަމާޒުކޮށް، 15 ބުރީގެ ވަގުފު އިމާރާތް "ދާރުއްނޫރު" އިފްތިތާހުކޮށް އެތަނުގެ ކުރެހުން މިއަދު ދައްކާލައިފިއެވެ.
ކީރިތި ޤުރްއާނާ ބެހޭ ވަޤުފު އިމާރާތް "ދާރުއްނޫރު" މަޝްރޫއު ރަސްމީކޮށް އިފްތިތާހުކޮށްފިއެވެ.
މި މަޝްރޫއު އިފްތިތާހުކޮށް، އިމާރާތުގެ ކުރެހުން ފުރަތަމަ ފަހަރަށް ދައްކާލާފައި ވަނީ ސަރުކާރަށް 156 ހަފުތާ ފުރުން ފާހަގަކުރުމަށް މިއަދު އިސްލާމީ މަރުކަޒުގައި ބޭއްވި ހާއްސަ ރަސްމިއްޔާތެއްގައެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ވަޤުފުގެ ދާއިރާ ފުޅާކުރުމަށް ފަށާފައިވާ މަސައްކަތްތަކުގެ ދަށުން ބިނާކުރާ މި އިމާރާތުން ލިބޭ ހުރިހާ ނަފާއެއް ހޭދަކުރުމަށް ހަމަޖެހިފައި ވަނީ ކީރިތި ޤުރްއާނުގެ ދާއިރާ އިތުރަށް ކުރިއަރުވައި ފުޅާކުރުމަށެވެ.
ޖުމްލަ 15 ބުރިއަށް ފަރުމާކޮށްފައިވާ މި އިމާރާތުގައި އޮފީސް ބަޔާއި، ކޮމާޝިއަލް އޭރިއާތަކުގެ އިތުރުން ހޯލް، މީޓިންގ ރޫމް، ލައިބްރަރީ އަދި ރެސްޓޯރެންޓު ފަދަ ވަސީލަތްތައް ހިމެނޭނެއެވެ. މި އިމާރާތް ފަރުމާކޮށްފައި ވަނީ މުޅި އިމާރާތުން ވީހާވެސް ބޮޑު އާމްދަނީއެއް ލިބޭނެ ގޮތަށެވެ.
މި މަޝްރޫއަށް ބޭނުންވާ ފައިސާ މިހާރު ހަމަޖެހިފައިވާއިރު، އިމާރާތް ކުރުމުގެ އަމަލީ މަސައްކަތް 2027ވަނަ އަހަރުގެ ޖަނަވަރީ މަހު ފެށުމަށްޓަކައި ވާންޖެހޭ އެންމެ ފަހުގެ ތައްޔާރީތައް އިސްލާމިކް މިނިސްޓްރީން ދަނީ ކުރަމުންނެވެ.
މާލެ ސަރަހައްދުގައި މީގެ އިތުރުން ވެސް "ދާރުލްއަރްގަމް" އަދި "ދާރުއްސަލާމް"ގެ ނަމުގައި ދެ ވަޤުފު މަޝްރޫއެއްގެ މަސައްކަތް މިހާރު ވަނީ ފަށާފައެވެ. މި މަޝްރޫއުތަކުގެ ބޭނުމަކީ ދައުލަތުގެ ބަޖެޓަށް ބަރޯސާނުވެ، އިސްލާމީ ދާއިރާގެ ކަންކަން ކުރިއަށް ގެންދެވޭނެ ފަދަ މާލީ ތަނަވަސްކަމެއް މިނިސްޓްރީއަށް ހޯދައިދިނުމެވެ.





ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.