ރައްޔިތުންގެ ކަންބޮޑުވުންތައް ހިއްސާކުރަން "ސިޓިޒެންސް ވޮއިސް" ޕޯޓަލް އިފުތިތާހުކޮށްފި
ރައީސް ޑރ. މުއިއްޒުގެ ވައުދުފުޅާ އެއްގޮތަށް، ރައްޔިތުންގެ ޝަކުވާތަކާއި ކަންބޮޑުވުންތައް ސަރުކާރަށް ހުށަހެޅޭނެ ހާއްސަ ޕޯޓަލެއް މިއަދު ވަނީ އިފުތިތާހުކޮށްފައެވެ.

ރައްޔިތުންގެ ހިޔާލާއި ކަންބޮޑުވުންތައް ރައީސުލްޖުމްހޫރިއްޔާގެ އޮފީހަށް ފަސޭހަކަމާ އެކު ހުށަހެޅޭނެ އިންތިޒާމު ހަމަޖެއްސުމަށްޓަކައި "ސިޓިޒެންސް ވޮއިސް" ގެ ނަމުގައި ހާއްސަ ޕޯޓަލެއް މިއަދު ވަނީ އިފުތިތާހުކޮށްފައެވެ.
މިއީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވެވަޑައިގެންފައިވާ ވައުދުފުޅާ އެއްގޮތަށް ގާއިމުކުރި ވަސީލަތެކެވެ.
މިއަހަރުގެ ރިޔާސީ ބަޔާން އިއްވަވަމުން، ރައްޔިތުންގެ ޝަކުވާތަކަށް ހައްލު ހޯދައިދިނުމަށްޓަކައި "ސިޓިޒަންސް ކޮމްޕްލެއިންޓްސް ބިއުރޯ" އެއް އުފައްދަވާނެ ކަމަށް ރައީސް އިއުލާނުކުރެއްވިއެވެ. އެ ބިއުރޯ މިހާރު ވަނީ ރައީސް އޮފީހުގެ ދަށުން އުފައްދަވައި، އެ އިދާރާގެ ވެރިޔަކަށް ޑރ. މާހިދު ޝަރީފު އައްޔަންކުރައްވާފައެވެ.
އަލަށް ތައާރަފުކުރި މި ޕޯޓަލް މެދުވެރިކޮށް ކަންބޮޑުވުންތައް ހިއްސާކުރުމުގެ އިތުރުން، ރައީސް ރައްޔިތުންނާ ބައްދަލުކުރެއްވުމަށް ބާއްވާ "ރައްޔިތުންގެ އަޑު" ސިލްސިލާގައި ބައިވެރިވުމަށް އެދުމުގެ ފުރުސަތު ވެސް ލިބޭނެއެވެ. އީފާސް މެދުވެރިކޮށް މި ޕޯޓަލަށް ވަދެވޭއިރު، ކުރިއަށް އޮތް ތަނުގައި މި ހިދުމަތަށް ހާއްސަ މޯބައިލް އެޕްލިކޭޝަނެއް ވެސް ތައާރަފުކުރާނެ ކަމަށް ރައީސް އޮފީހުން ބުނެއެވެ.
ޕޯޓަލްގެ އިތުރުން، މިހާރު ވެސް ސިޓިޒަންސް ކޮމްޕްލެއިންޓްސް ބިއުރޯގެ ހޮޓްލައިން ނަންބަރު 1470އަށް ގުޅައިގެން ރައްޔިތުންނަށް ޝަކުވާތައް ހުށަހެޅޭނެ އިންތިޒާމު ވަނީ ހަމަޖައްސާފައެވެ.




ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.