އަންނަ އަހަރު އިތުރު 400 ޓީޗަރުން ނަގަނީ
އަންނަ އަހަރު 400އަށް ވުރެ ގިނަ ޓީޗަރުން އިތުރަށް ނަގަން ބަޖެޓުގައި ހިމަނައިފިއެވެ.
އަންނަ އަހަރަށް ލަފާކުރާ ބެޖެޓް ހުށަހަޅުއްވަމުން ފިނޭންސް މިނިސްޓަރު އިބްރާހީމް އަމީރު ވިދާޅުވީ ކުދިންނަށް ފޯރުކޮށްދޭ ތަޢުލީމުގެ ފެންވަރު މަތިކޮށް، ޓީޗަރުން މަދުވުމުގެ ސަބަބުން ތައުލީމު ފޯރުކޮށްދިނުމުގައި ދިމާވާ ހުރަސްތަކަށް ޙައްލު ހޯދުމުގެގޮތުން، 2022ވަނަ އަހަރު 400އަށްވުރެ ގިނަ އައު ޓީޗަރުން ނެގުމަށް ނިންމައިފައިވާކަމަށެވެ.
މީގެ އިތުރުން މިނިސްޓަރ ވިދާޅުވީ ތައުލީމީ ދާއިރާއަށް ޢުމްރާނީ ގޮތުންނާއި، ޓީޗަރުންގެ ނިސްބަތުންނާއި، ބޭނުންވާ ވަސީލަތްތަކަށް ބަޖެޓުގެ ތެރެއިން ކުރިއަށް ވުރެ ފަހިވެގެންދާނެ ކަމަށެވެ. އަދި ހުރިހާ ކުދިންނަކީ ވެސް ދުޅަހެޔޮ ސިއްޙަތެއްގައި ތިބެގެން ކިޔެވުމުގެ ފުރުސަތު ފަހިވެފައިވާ ކުދިންނަށް ހެދުމަށް މި ސަރުކާރުން ފެށި ހެނދުނުގެ ނާސްތާ ޕްރޮގްރާމް، އިތުރަށް ހަރުދަނާކޮށް އަންނަ އަހަރު ކުރިއަށް ގެންދެވޭނެ ކަމަށް ވެސް މިނިސްޓަރ އަމީރު ވިދާޅުވިއެވެ.
މީގެ އިތުރުން 141 ރަށެއްގައި ތައުލީމީ ދާއިރާގެ 193 މަޝްރޫއެއް އަންނަ އަހަރު ހިންގުމަށް ރާވައިފައިވާކަމަށް މިނިސްޓަރ ވިދާޅުވިއެވެ. މީގެ ތެރޭގައި 26 ރަށެއްގެ ސްކޫލްތަކުގެ ޢިމާރާތާއި ވަސީލަތްތައް ތަރައްޤީކުރުމުގެ އައު މަޝްރޫއުތައް ހިމެނޭކަމަށް މިނިސްޓަރ ވިދާޅުވިއެވެ.
އަންނަ އަހަރަށް ދައުލަތުން ލަފާކުރާ ބަޖެޓުގައި ތައުލީމާއި މަތީ ތަޢުލީމުގެ ދާއިރާއަށް 4.1 ބިލިޔަން ރުފިޔާ ވަނީ ކަނޑައަޅައިފައެވެ.
