ނޫސް މަޖައްލާތަކުގެ މައުލޫމާތު އަދާހަމަކުރުމުގެ ހާއްސަ މަސައްކަތެއް ފަށައިފި
ހޯމް މިނިސްޓްރީގައި ރަޖިސްޓްރީކޮށްފައިވާ ނޫސް މަޖައްލާތަކުގެ މައުލޫމާތު އަދާހަމަކުރުމުގެ މަސައްކަތް ފަށައިފިކަމަށް އެމިނިސްޓްރީން ވިދާޅުވެއްޖެއެވެ.
ހޯމް މިނިސްޓްރީން ވިދާޅުވިގޮތުގައި މިދިޔަ އަހަރުގެ ނިޔަލަށް އެ މިނިސްޓްރީގައި 228 ނޫސް،މަޖައްލާ ވަނީ ރަޖިސްޓަރީ ކުރެވިފައިވެއެވެ. އެމިނިސްޓްރީން ވިދާޅުވީ މި 228 ނޫސް މަޖައްލާތަކުގެ ތެރޭގައި އެއްގޮތަކަށް ވެސް މައުލޫމާތު އަޕްޑޭޓް ނުކުރާ ފަރާތްތައް ވެސް އެބަހުރި ކަމަށެވެ.
އެހެންކަމުން މިދިޔަ 2020 ވަނަ އަހަރުގެ ނިޔަލަށް އެއްވެސް މައުލޫމާތު އަޕްޑޭޓް ނުކޮށް ހުރިނަމަ އެކަން އެމިނިސްޓްރީއަށް އެންގެވުމަށް އެމިނިސްޓްރީން އެދިފައި ވެއެވެ. މިގޮތުން މައުލޫމާތަށް އައިސްފައިވާ ބަދަލުތައް މި ނޮވެމްބަރު މަހުގެ 30ވަނަ ދުވަހުގެ 13:30ގެ ކުރިން މައުލޫމާތަށް އައިސްފައިވާ ބަދަލު އެނގޭނެހެން ސިޓީއަކުން ހޯމް މިނިސްޓްރީއަށް ނުވަތަ [email protected]އަށް އީމެއިލް ކޮށްދެއްވުމަށް އެމިނިސްޓްރީން އެދެއެވެ.
ރާއްޖޭގައި ގިނަ އަދަދެއްގެ ނޫސް މަޖައްލާތައް ހިންގައެވެ. އަދި މިފަދަ މަޖައްލާތަކުން ގެނެސްދޭ މައުލޫމާތާއި ހަބަރުތައް ބްރޯޑްކާސްޓިން ކޮމިޝަނުން ދަނީ މޮނީޓަރ ކުރައްވަމުންނެވެ.
