ނާސްތާ ޕްރޮގުރާމް ކާމިޔާބު، ކިޔެވުމަށް ބަދަލު އަންނަން ފަށައިފި: މިނިސްޓަރު
ސްކޫލު ދަރިވަރުންނަށް އަމާޒުކޮށްގެން ފެށި ނާސްތާ ޕްރޮގުރާމަކީ ރައީސް އިބްރާހިމް މުހައްމަދު ޞާލިހުގެ ސަރުކާރުން ފެށި އެންމެ ކާމިޔާބު އެއް ޕްރޮގުރާމު ކަމަށާއި އެ ޕްރޮގުރާމުގެ ދަށުން ދުވާލަކު 49،000 ދަރިވަރުން ނާސްތާ ނަގަމުން ދިޔަކަމަށް އެޑިއުކޭޝަން މިނިސްޓަރު ޑރ އައިޝަތު އަލީ ވިދާޅުވެއްޖެއެވެ.
މިއަދު އޮތް ރައްޔިތުންގެ މަޖިލީހުގެ ޖަލްސާގައި މެމްބަރުން ކުރައްވާ ސުވާލުތަކަށް ޖަވާބުދެއްވުމަށް ހާޒިރުވެވަޑައިގެން މިނިސްޓަރު އައިޝަތު ވިދާޅުވީ ނާސްތާ ޕްރޮގުރާމު ކާމިޔާބުކަމާ އެކު ކުރިއަށް ގެންދިޔުމަށް މިހައިތަނަށް 224 މިލިއަން ރުފިޔާ ހަރަދު ކުރެވިފައިވާކަމަށެވެ. މިނިސްޓަރު ވިދާޅުވީ ޕްރޮގުރާމުގެ ސަބަބުން ބައެއް އެދެވޭ ބަދަލުތަކެއް އައިސްފައިވާކަން ފާހަގަކުރެވޭ ކަމަށެވެ.
މިހާތަނަށް ލިބިފައި ހުރީ އެނެކްޑޯޓަލް އެވިޑެންސް ނުވަތަ އެކި ބޭފުޅުން ވިދާޅުވާ ވާހަކަކަން ފާހަގަކުރައްވައި މިނިސްޓަރު ވިދާޅުވީ މިޕްރޮގުރާމުގެ ސީދާ ނަތީޖާ ދެނެގަތުމަށް ދިރާސާއެއް ހިންގިފައި ނުވާކަމަށެވެ. އަދި ވިދާޅުވީ ކޮވިޑް-19ގެ ހާލަތާ ގުޅިގެން ނާސްތާ ޕްރޮގުރާމް މެދުކަނޑައިލާން ޖެހުނު ނަމަވެސް އަންނަ އަހަރުގެ ޖެނުއަރީ މަހުގެ ތެރޭގައި އަލުން މި ޕްރޮގުރާމު ފަށާނެ ކަމަށެވެ.
"އަޅުގަނޑުމެންނަށް ސްކޫލުގައި ކިޔަވައިދެއްވާ މުދައްރިސުންނާ ބެލެނިވެރިންނާ އެކިއެކި ފަރާތްތަކުން ހަބަރު ލިބޭ ގޮތުގައި ދަރިވަރުންގެ ކިޔެވުމަށް މިކަމުން އެދެވޭ ނަތީޖާ ފެންނަން ފަށައިފި" މިނިސްޓަރު ވިދާޅުވިއެވެ.
މިނިސްޓަރު ވިދާޅުވީ ނާސްތާ ޕްރޮގުރާމް ފެށުމާ އެކު ދަރިވަރުން ފިލާވަޅުތަކަށް ފޯކަސްކުރާ މިންވަރު އިތުރުވެއްޖެ ކަމަށެވެ. އެގޮތުން ވަރުބަލިވުމުގެ ސަބަބުން ދަރިވަރުން ބަނޑުގައި ރިއްސުމާ ބޮލުގައި ރިއްސުން ފަދަ ކަންކަން ދިމާވާ މިންވަރު މަދުވެއްޖެކަމަށް މިނިސްޓަރު ވިދާޅުވިއެވެ. މީގެ އިތުރުން ދަރިވަރުން ސްކޫލަށް ދަނީ ވަރަށް ދާހިތުންކަމަށް ވިދާޅުވިއެވެ. ނާސްތާ ނެގުމަށް ހޭދަވާ ވަގުތުކޮޅަކީ ރައްޓެހިންނާ އެކު ހޭދަކޮށްލަން ލިބޭ ވަރަށް އުފާވެރި ވަގުތުކޮޅެއްކަމަށް މިނިސްޓަރު ވަނީ ވިދާޅުވެފައެވެ.
"އެހެންވީމަ ކުރީގަ ސްކޫލަށް ނާންނަ ކުދިން ނުވަތަ ގަޑިޖެހިގެން އަންނަ ކުދިން ގަޑިއަށް ސްކޫލަށް އަންނަކަން ވެސް ފާހަގަކުރެވޭ." މިނިސްޓަރު އިތުރަށް ވިދާޅުވިއެވެ.
މީގެ އިތުރުން މިނިސްޓަރު އައިޝަތު ވިދާޅުވީ ނާސްތާ ޕްރޮގުރާމް ފެށި ފަހުން ސްކޫލުގައި ބާއްވާ އެކިއެކި ހަރަކާތްތަކުގައި ބައިވެރިވުމުގެ ހަކަތަ ދަރިވަރުންގެ ކިބައިން ފެންނަން ފަށައިފައިވާ ކަމަށެވެ. އަންނަ ޖެނުއަރީމަހު ނާސްތާ ޕްރޮގުރާމު އަލުން ފެށުމަށް ފަހު މިނިސްޓްރީން ހާއްސަ ދިރާސާއެއް ކުރަން ހަމަޖެހިފައިވާ ކަމަށާއި އެ ދިރާސާގައި މި ޕްރޮގުރާމުގެ ނަތީޖާ ދެނެގަންނާނެކަމަށް މިނިސްޓަރު ވިދާޅުވިއެވެ.
Ads by STO
