އަމްރިތާއަށް އަންމޯލް ޕްރޮޕޯސް ކުރީ ލައިވް ޕްރޮގްރާމެއްގެ ތެރެއިން!
ބޮލީވުޑްގެ ކާމިޔާބު ބަތަލާ އަމްރިތާ ރާއޯއާއި އޭނާގެ ފިރިމީހާ އާރ ޖޭ އަންމޯލްއާ ދެމީހުންނަކީ ގިނަ ބައެއްގެ ފޭވަރިޓް ޖޯޑެވެ.
ދާދިފަހުން އިންޑިއާގެ ނޫހަކަށް ދިން އިންޓަރވިއުއެއްގައި ދެމީހުންގެ ލޯބީގެ ވާހަކަ މިވަނީ ކިޔައިދީފައެވެ. މިގޮތުން އަމްރިތާ ބުނިގޮތުގައި އަންމޯލް އޭނާ ކުރެން އިންނަން އެހީ ލައިވް ޕްރޮގްރާމެއްގެ ތެރެއިންނެވެ. ދެމީހުންގެ ލޯބީގެ ވާހަކަ ފެށުނުގޮތުގެ ހަނދާން އައު ކުރަމުން ދެމީހުން ބުނި ގޮތުގައި އަންމޯލް ރޭޑިއޯ ޝޯއެއްގައި އިން ވަގުތު އަމްރިތާ ވެސް ޝޫޓިން ނިންމުމަށް ފަހު އެ ޕްރޮގްރާމް އަޑުއަހަން އަމްރިތާ އިނެވެ.
"އަހަރުމެންނަކީ ކުރިން ވެސް އެކުވެރިން. އެކަމަކު އެރޭ މެސެޖެއް ކުރަން އުޅެފައި ވެސް ހިތަށް އެރީ މިރޭ މެސެޖެއް ކޮށްފިއްޔާ ދެން ބޮޑުވަރުވެދާނެ ނޫންބާއޭ." އެރޭގެ ޝޯ އަޑުއަހަން އިށީނދެއިން ވަގުތު އަންމޯލްގެ ޕްރޮގްރާމް އަންނަން ފެށުމުން ކަންވީ ގޮތް ކިޔައިދެމުން އަމްރިތާ ބުންޏެވެ.
އެހެން ނަމަވެސް އެރޭ ޝޯ އަޑުއަހަން އިން ވާހަކަ އަންމޯލް ގާތު ބުނި ކަމަށާއި އެއާ އެކު އަޑުއަހަން އިންނަން އަންމޯލް ބުނިކަމަށް އަމްރިތާ ބުންޏެވެ.
އެ ޝޯގައި އަންމޯލް އަމްރިތާގެ ފޭވަރިޓް ލަވަ ޖެހުމަށް ފަހު މައިކް އޮން ކޮށްފައި ހިތުގައިވާ އިހުސާސްތައް ކިޔައިދިން ކަމަށާއި އަދި އަޑުއަހަން އިން އޭނާގެ "ހިތުގެ ރާނީ"ވެސް އޭނާއާ މެދު އެ އިހުސާސް ކުރެވޭ ނަމަ ގުޅުމަށް އެދުނު ކަމަށް އަމްރިތާ ބުންޏެވެ.
"އޭނާ އަހަރެން ގާތު ލޯބިވާ ވަހަކަ ބުނީ ލައިވް ޕްރޮގްރާމެއްގެ ތެރެއިން. މުޅި ސިޓީ އޮތީ އަޑު އަހަން" އަމްރިތާ ބުންޏެވެ.
އޭގެ ފަހުން އަހަރުތަކެއް ވަންދެން ލޯބީގެ ގޮތުން ގުޅިގެން އުޅުމަށް ފަހު އެ ދެމީހުން ކައިވެނި ކޮށްފައި ވަނީ 2016 ވަނަ އަހަރުއެވެ. އަދި މިދިޔަ އަހަރުގެ ނޮވެމްބަރު މަހު އެ ދެމަފިރިންނަށް ވަނީ ދަރިއަކު ވެސް ލިބިފައެވެ.
