Tuesday, 17 November 2026
Advertisement
Ooredoo — Article-Top (leaderboard)
ސަރުކާރު

އަންނަ އަހަރުގެ ބަޖެޓުގައި ވިލުފުށީގެ ގިނަ މަޝްރޫޢުތަކެއް ހިމެނިފައިވޭ: ރައީސް ޞާލިޙް

އަންނަ އަހަރުގެ ބަޖެޓުގައި ވިލުފުށީގެ ގިނަ މަޝްރޫޢުތަކެއް ހިމެނިފައިވޭ: ރައީސް ޞާލިޙް

އަންނަ އަހަރުގެ ބަޖެޓުގައި ތ. ވިލުފުށީގެ ގިނަ މަޝްރޫޢުތަކެއް ހިމެނިފައިވާ ކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވެފައި ވަނީ ވިލުފުށީ ކައުންސިލާ މިއަދު މެންދުރު ފަހު ބައްދަލުކުރައްވައި ދެއްކެވި ވާހަކަފުޅުގައެވެ.

މި ބައްދަލުކުރެއްވުމުގައި ވިލުފުށީ ކައުންސިލުން ވަނީ އެރަށުގައި އަޅަންހަމަޖެހިފައިވާ ހޮސްޕިޓަލާ ބެހޭ ގޮތުންނާއި، އެއާރޕޯޓް އެޅުމާއި ބަނދަރު ފުންކުރުމާއި ގިރާ ސަރަޙައްދު ހިމާޔަތްކުރުމާއި ޞިއްޙީ ދާއިރާއާ ތަޢުލީމީ ދާއިރާއާއި ރަށުގެ އިޖްތިމާޢީ އިޤްތިޞާދީ ތަރައްޤީއަށް އެރަށުގެ ކައުންސިލާ ރައްޔިތުން ބޭނުންވާ ކަންކަން ފާހަގަ ކުރައްވައިފައެވެ.

Advertisement
HDC — Sidebar (box)

މީގެ އިތުރުން ރަށުގެ ތަރައްޤީއަށް ކުރިޔަށް ގެންދިއުމަށް ހަމަޖެހިފައިވާ ބައެއް މަޝްރޫޢުތަކާ ގުޅޭ ގޮތުން މި ބައްދަލުކުރެއްވުމުގައި ކައުންސިލަރުން މަޝްވަރާ ކުރެއްވިއެވެ.

މި ބައްދަލުކުރެއްވުމުގައި ރައީސް ވަނީ ކޯވިޑްގެ ޙާލަތާ އެކު ކުރިމަތިވި ބަޖެޓުގެ ދަތިކަމާ އެކު ބައެއް މަޝްރޫޢުތައް މަޑުޖައްސައިލާން ޖެހުނުކަން ފާހަގަކުރައްވައިފައެވެ. ނަމަވެސް އަންނަ އަހަރުގެ ބަޖެޓުގައި ވިލުފުށީގެ ގިނަ މަޝްރޫޢުތަކެއް ހިމެނިފައިވާކަން ފާހަގަކުރައްވައި ކައުންސިލުން ފާހަގަކުރެއްވި މަޝްރޫޢުތަކުގެ އެންމެފަހުގެ މަޢުލޫމާތުތައް ރައީސް ކައުންސިލަރުންނާ ޙިއްޞާކުރެއްވިއެވެ. އެގޮތުން އެރަށުގައި އަޅަން ހަމަޖެހިފައިވާ ހޮސްޕިޓަލްގެ ފަންޑިންގ އެއްބަސްވުމުގައި ވަރަށް އަވަހަށް ސޮއިކުރުމަށް ހަމަޖެހިފައިވާކަން ހާމަކުރައްވައި އެއާރޕޯޓާއި، ބަނދަރު ފުންކުރުން ފަދަ މަސައްކަތްތައް ކުރިޔަށް ގެންދިއުމަށް ސަރުކާރުން ރާއްވަވައިފައިވާ ގޮތްތަކުގެ މަޢުލޫމާތު ވެސް ކައުންސިލަރުންނާ ރައީސް ޙިއްޞާކުރެއްވިއެވެ. މީގެ އިތުރުން ކައުންސިލަރުން ފާހަގަކުރެއްވި ކަންކަމުގައި ސަރުކާރުގެ ކަމާގުޅޭ އިދާރާތަކާ މަޝްވަރާ ކުރައްވާނެކަމަށް ވެސް އެ މަނިކުފާނު ވިދާޅުވިއެވެ.

ވިލުފުށީ ކައުންސިލާ އެކު ރައީސް ބޭއްވި މި ބައްދަލުކުރެއްވުމުގައި ރައީސް އޮފީހުގެ ޗީފް އޮފް ސްޓާފް، އަލްއުސްތާޛު ޢަލީ ޒާހިރުގެ އިތުރުން ރައްޔިތުންގެ މަޖިލީހުގެ ވިލުފުށީ ދާއިރާގެ މެންބަރު ޙަސަން ޢަފީފު ބައިވެރިވެވަޑައިގެންނެވިއެވެ.

ރިއެކްޝަން

Advertisement
HDC — Sidebar (box)

ކޮމެންޓް

މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.