ކުރިއެކޭ އެއްގޮތަށް މިހާރު 24 ގަޑިއިރު ޕާސްޕޯޓަށް އެދެވޭނެ
ޕާސްޕޯޓް ޚިދުމަތަށް ކުރިއެކޭ އެއްގޮތަށް މިހާރު 24 ގަޑިއިރު ހުށަހެޅޭނެކަމަށް މޯލްޑިވްސް އިމިގްރޭޝަނުން ވިދާޅުވެއްޖެއެވެ.
އިމިގްރޭޝަނުން ވިދާޅުވީ މިއަދުން ފެށިގެން ކޮންމެ ދުވަހަކު 24 ގަޑިއިރު ޕާސްޕޯޓަށް އެދި ހުށަހެޅޭނެ ކަމަށެވެ. މީގެ އިތުރުން އިމިގްރޭޝަނުން ވިދާޅުވީ ޕާސްޕޯޓަށް ހެއްދުމަށް ހުށަހަޅާ އެޕްލިކޭޝަންތައް ކުރިއަށްގެންދާނީ ފޯމުތައް ލިބޭ ތަރުތީބުން ކަމަށެވެ. އަދި ޕާސްޕޯޓަށް ފައިސާ ދެއްކުން ވެސް އޮންލައިންކޮށް ކުރިއަށް ގެންދެވޭނެ ކަމަށާއި މިއީ ރައްޔިތުންނަށް ވީހާ ވެސް ފަސޭހައިން އިމިގްރޭޝަންގެ ޚިދުމަތްތައް ފޯރުކޮށްދިނުމަށް ޓަކައި ކުރަމުންދާ މަސައްކަތްތަކެއް ކަމަށް ވެސް އިމިގްރޭޝަނުން ވިދާޅުވިއެވެ.
އިމިގްރޭޝަން ވަނީ ޕާސްޕޯޓަށް އެދުމަށް "އިމުގަ"ނަމުގައި އޮންލައިން ޕޯޓަލްއެއް ގާއިމް ކޮށްފައެވެ. ނަމަވެސް ޕޯޓަލްގެ ފެންވަރު ރަނގަޅު ކުރުމަށް ޓަކައި މީގެ މަހެއްހާ ދުވަހުގެ ކުރިން ޕާސްޕޯޓަށް އެދުމުގެ ވަގުތުތަކަށް ވަނީ ބަދަލުތަކެއް ގެނެސްފައެވެ.
