އައު ވެރިއަންޓާ ގުޅިގެން ރާއްޖެއިން އަޅާނެ ފިޔަވަޅާ މެދު ގޮތެއް ނުނިމޭ!
ދުނިޔޭގެ އެކި ކަންކޮޅުތަކުގައި މިހާރު ފެތުރެމުން އަންނަ ކޮވިޑް-19ގެ އައު ވެރިއަންޓާ ގުޅިގެން ރާއްޖޭގައި އަޅާނެ ފިޔަވަޅާ މެދު އަދި ވަކި ގޮތެއް ނުނިންމާ ކަމަށް ހެލްތު އެމަޖެންސީ އޮޕަރޭޝަން ސެންޓަރ (އެޗްއީއޯސީ)އިން ވިދާޅުވެއްޖެއެވެ.
ދެކުނު އެފްރިކާއިން އަލަށް ފެތުރިގެން އުޅޭ އައު ވޭރިއަންޓު، "އޮމިކްރޯން" ވޭރިއަންޓު މިހާރު ދުނިޔޭގެ އެހެން ޤައުމުތަކުގައި ވެސް ދަނީ ފެތުރެމުންނެވެ.
މިކަމާ ގުޅިގެން ރާއްޖޭގައި އަޅަން ގަސްތުކޮށްފައިވާ ފިޔަވަޅުތަކަކީ ކޮބައިތޯ އަދި ވަމުންދާ ތައްޔާރީތަކަކީ ކޮބައިތޯ "ދެން"އިން ސުވާލު ކުރުމުން އެޗްއީއޯސީގެ މީޑިއާ އޮފިޝަލް އަދި ހެލްތް މިނިސްޓްރީގެ ކޮލިޓީ އެޝުއަރެންސް ކޮމިޝަނަރު ތަސްލީމާ އުސްމާން (ތަހޭ) ވިދާޅުވީ، އަދި ވަކި ފިޔަވަޅެއް އަޅަން ނިންމައިފައި ނުވާ ކަމަށާއި ނަމަވެސް އެކަމާ ގުޅޭގޮތުން މަޝްވަރާތައް ކުރަމުން އަންނަ ކަމަށެވެ.
"އާ ވޭރިއަންޓް ފެނިފައިވަ ނީ ވެސް އިއްޔެ ކަމަށް ވާތީ، ވާނެ ތައްޔާރީތަށް ނިންމާނީ މަޝްވަރާ ކުރުމަށް ފަހު" ތަހޭ ވިދާޅުވިއެވެ.
ކޮވިޑްގެ މި އައު ވޭރިއަންޓު އެހެން ވޭރިއަންޓުތަކަށް ވުރެ ހަލުވި ކަމާއެކު ފެތުރޭ ކަމަށާއި ދިފާއީ ނިޒާމު ވެސް ވަރަށް ދަށްކޮށްލާކަމަށް ރިޕޯޓުތަކުން ބުނެއެވެ. އެހެންކަމުން މި ވޭރިއަންޓް ފެތުރުން ކޮންޓްރޯލު ކުރުމަށް ބައެއް ޤައުމުތަކުން ވަނީ ބޯޑަރު ބަންދު ކުރުން ފަދަ ހަރުކަށި ފިޔަވަޅު ވެސް އަޅަން ފަށައިފައެވެ.
Ads by STO
