އުދައްޔުގެ މަރު: ހެކި ރައްކާތެރި ކުރުމުގެ އަމުރަކަށް އެދިއްޖެ
ގއ. މާމެންދޫގައި ގުރޫޕް މާރާމާރީއެއް ހިންގައި އުމުރުން 17 އަހަރުގެ އަހްމަދު އުދައްޔު މަރައިލި މައްސަލައިގައި ދައުލަތުން ދައުވާ އުފުލައިފައިވާ ތިން މީހުންނާ ދެކޮޅަށް ހުށަހަޅައިފައިވާ ހެކިތައް ރައްކާތެރިކޮށްދިނުމުގެ އަމުރަކަށް މިއަދު އެދިއްޖެއެވެ.
އެ އަމުރަށް އެދިފައި ވަނީ މި މައްސަލައާ ގުޅިގެން ކްރިމިނަލް ކޯޓުގައި މިއަދު ބާއްވައިފައިވާ އިބްތިދާއީ އަޑުއެހުމެއްގައެވެ.
އުދައްޔުގެ މަރުގެ މައްސަލައިގައި ދައުލަތުން ދައުވާ އުފުލައިފައި ވަނީ ގއ. މާމެންދޫ / ރިހިފަރުދާގެ އަހްމަދު ޝަމީމާއި، އެ ރަށު ބިލަތްމާގެ ޝަރަފް ރަޝީދު އަދި ހަމަ އެ ރަށު ގުލްފާމުގެ މުހައްމަދު މާޒިންގެ މައްޗަށެވެ. މީގެއިތުރުން މިމައްސަލައާ ގުޅިގެން 18 އަހަރުން ދަށުގެ ކުޑަ ކުއްޖަކު ވެސް ވަނީ ހައްޔަރުކޮށް ދައުވާ ކޮށްފައެވެ.
މި މައްސަލައިގައި ހައްޔަރު ކޮށްފައިވާ މީހުންގެ ތެރެއިން 18 އަހަރުން މަތީގެ ތިން މީހުންގެ މައްޗަށް އުފުލައިފައި ވަނީ ތޫނު އެއްޗެއް ބޭނުންކޮށްގެން ގަސްދުގައި މީހަކު މަރައިލުމުގައި ބައިވެރިވިކަމުގެ ދައުވާއާއި މީހަކަށް ނުރައްކާތެރި ހާނިއްކައެއްވާ ގޮތަށް ތޫނު އެއްޗެއް ނުވަތަ ހަތިޔާރެއް ބޭނުންކޮށްގެން މާރާމާރީ ހިންގުމުގައި ބައިވެރިވި ކަމުގެ ދައުވާއެވެ. އަދި 18 އަހަރުން ދަށުގެ ކުއްޖާގެ މައްޗަށް އުފުލައިފައި ވަނީ ތޫނު އެއްޗެއް ބޭނުންކޮށްގެން ގަސްދުގައި މީހަކު މެރުމުގެ ކުށުގެ ދައުވާއެވެ.
ދައުލަތުގެ ފަރާތުން ހެކި ރައްކާތެރިކުރުމުގެ އަމުރަކަށް އެދިފައިވީ ނަމަވެސް ދިފާއަށް އެ ފޯމު ފޯރުކޮށްދީފައެއް ނުވެއެވެ. އެހެންކަމުން ސިއްރު ހެކިންނާ ބެހޭ މައުލޫމާތުތައް އުނިކުރުމަށް ފަހު އަންނަ އާދީއްތަ ދުވަހު އަލުން ފޯމު ހުށަހަޅަން މި މައްސަލަ ބައްލަވާ ގާޒީ އަލީ ނަދީމް ވަނީ އެދިވަޑައިގެންފައެވެ.
