ޙަސީނާގެ ދަތުރުފުޅާ ގުޅިގެން، ސަލާމަތީ ބާރުތަކުން ޚާއްޞަ އޮޕަރޭޝަނެއް ފަށައިފި
ބަނގްލަދޭޝްގެ ބޮޑުވަޒީރުގެ ދަތުރުފުޅާ ގުޅިގެން، ސަލާމަތީ ކަންތައްތައް އިތުރަށް ވަރުގަދަ ކުރުމަށް ސަލާމަތީ ޚިދުމަތްތަކުން ޚާއްޞަ އޮޕަރޭޝަނެއް ފަށައިފިއެވެ.
ސަލާމަތީ ބާރުތަކުން ނެރުއްވި ނޫސް ބަޔާނެއްގައި ވިދާޅުވީ، ބަނގްލަދޭޝްގެ ބޮޑުވަޒީރު ޝެއިޚް ޙަސީނާ ދިވެހިރާއްޖެއަށް ފައްޓަވައިފައިވާ ފުރަމާނަ ދަތުރުފުޅާ ގުޅިގެން، ސަލާމަތީ ކަންތައްތައް އިތުރަށް ވަރުގަދަ ކުރުމަށް ޓަކައި، ސަލާމަތީ ޚިދުމަތްތަކުން ޚާއްޞަ އޮޕަރޭޝަނެއް ކުރިއަށް ގެންދަން ނިންމަވައިފައިވާ ކަމަށެވެ.
އަދި މި އޮޕަރޭޝަން ކުރިއަށް ގެންދިއުމުގައި ދިވެހި ލޮބުވެތި ރައްޔިތުންގެ އެއްބާރުލުމާއި އެހީތެރިކަން ބޭނުންވާކަމަށް އެ ބަޔާނުގައި ވިދާޅުވެފައިވެއެވެ.
ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްގެ ދަޢުވަތަކަށް ކުރައްވާ ދެ ދުވަހުގެ ރަސްމީ ދަތުރުފުޅެއްގައި ބޮޑުވަޒީރު ޝައިޚް ޙަސީނާ މިހާރު ވަނީ މާލެ ވަޑައިގެންފައެވެ.
މި ދަތުރުފުޅުގައި ދެކުނު އޭޝިއާގެ ދެ ގައުމުގެ ރަހުމަތްތެރިކަމުގެ ރަމްޒެއްގެ ގޮތުން ބަނގްލަދޭޝްއިން ރާއްޖެއަށް 13 އަސްކަރީ ވެހިކަލް ހަދިޔާ ކުރާނެއެވެ.
މީގެ އިތުރުން މި ދަތުރުފުޅުގައި ތައުލީމާއި ސިއްހަތާއި ކުޅިވަރާއި އަދި ޒުވާނުންނާ ގުޅޭ ދާއިރާތަކުން ވެސް އެއްބަސްވުންތަކުގައި ސޮއި ކުރަން ވަނީ ހަމަޖެހިފައެވެ. އަދި ރާއްޖެއާއި ބަނގްލަދޭޝްއާ ދެމެދު ކޮލިފައިޑް ހެލްތު ޕްރޮފެޝަނަލްސް ރެކްރޫޓް ކުރުމާ ބެހޭ އެއްބަސްވުން އައު ކުރާނެއެވެ.
މި ދަތުރުފުޅުގައި ނައިބު ރައީސް ފައިސަލް ނަސީމާއި، ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދާއި، އުއްތަމަ ފަނޑިޔާރު އަލްއުސްތާޛު އަހުމަދު މުއުތަސިމް އަދުނާން، ހޮޓެލް ޖެންގައި ބަނގްލަދޭޝްގެ ބޮޑުވަޒީރުގެ އަރިހަށް އިހްތިރާމްގެ ޒިޔާރަތެއް ކުރެއްވުމަށް ވެސް ވަނީ ހަމަޖެހިފައެވެ.
ޝައިޚް ހަސީނާ މަޖިލީހުގައި ތަޤްރީރު ކުރައްވާނީ ޑިސެމްބަރު މަހުގެ 23ވަނަ ދުވަހުގެ މެންދުރުފަހުގެ ވަގުތެއްގައެވެ.
Ads by STO
