ރާއްޖެއާ ބަނގްލަދޭޝްއާ ދެމެދު 4 ދާއިރާއަކުން އެއްބަސްވުން ބަދަލުކޮށްފި
ބަނގްލަދޭޝްއިން ދިވެހިރާއަށް 4 ދާއިރާއަކުން އެހީތެރިކަން ދިނުމުގެ އެއްބަސްވުންތަކުގައި ސޮއިކޮށްފިއެވެ.
ދެ ޤައުމުގެ ދެމެދުގައި ޤާއިމުކުރި އެއްބަސްވުންތަކުގެ ތެރޭގައި ރާއްޖޭގެ ސިއްޙީ ދާއިރާއަށް ބޭނުންވާ ޕްރޮފެޝަނުން ހޯދުމާއި ތަމްރީން ކުރުމުގައި އެހީތެރިކަން ފޯރުކޮށްދިނުމަށް ޤާއިމުކުރި އެއްބަސްވުން، ވިޔަފާރީގެ ދާއިރާއިން ޓެކްސްއާ ގުޅޭ އެއްބަސްވުން، ކުޅިވަރާ ޒުވާނުންގެ ތަރައްޤީއަށް އެކި ދާއިރާތަކުން މަސައްކަތްކުރެއްވުމުގެ އެއްބަސްވުން އަދި ގައިދީން ބަދަލުކުރުމާ ބެހޭ އެއްބަސްވުން ހިމެނެއެވެ.
ޝައިޚް ޙަސީނާގެ މި ދަތުރުފުޅުގައި ދެކުނު އޭޝިއާގެ ދެ ގައުމުގެ ރަހުމަތްތެރިކަމުގެ ރަމްޒެއްގެ ގޮތުން ބަނގްލަދޭޝްއިން ރާއްޖެއަށް 13 އަސްކަރީ ވެހިކަލް ރަމްޒީކޮށް ހަވާލުކުރުން ކުރިއަށްގެންގޮސްފައި ވެއެވެ.
އެއްބަސްވުންތަކުގައި ސޮއިކޮށް، ލިޔުން ހަވާލުކުރުމަށް ބޭއްވި ރަސްމިއްޔާތުގައި ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިޙުއާއި ކެބިނެޓް މެންބަރުންނާއި ބަނގްލަދޭޝް ސަރުކާރުގެ އިސްވެރިން ބައިވެރިވެ ވަޑައިގެންނެވިއެވެ.
ޝެއިޙް ޙަސީނާގެ މި ދަތުރުފުޅަކީ ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިޙް، މިއަހަރުގެ މަރޗްމަހު ބަނގްލަދޭޝަށް ކުރެއްވި ދަތުރުފުޅުގައި އެކަމަނާއަށް އެރުވި ދަޢުވަތަކަށް ކުރައްވާ ފުރަމާނަ ދަތުރުފުޅެކެވެ.
