ފްރާންސްގައި ދުވާލެއްގެ މައްޗަށް ކޮވިޑް ޖެހޭ މީހުންގެ އަދަދު 90،000 އާ ގާތަށް، ރިކޯޑް އަދަދެއް
ފްރާންސްގައި ދުވާލެއްގެ މައްޗަށް ކޮވިޑް ޖެހޭ މީހުންގެ އަދަދު 90،000އާ ގާތްކޮށްފިއެވެ.
އެ ގައުމުން ބުރާސްފަތި ދުވަހު 88،000 މީހުން ކޯވިޑް-19އަށް ފައްސިވެފައިވާއިރު، މިއީ ކޮވިޑް ބަލިމަޑުކަން ފެށުނު ފަހުން އެ ޤައުމުގައި އެންމެ ގިނަ ޢަދަދެއްގެ މީހުން ކޮވިޑް-19އަށް ފައްސިވި ދުވަހެވެ.
ފްރާންސްގައި ފާއިތުވި 24 ގަޑިއިރުގެ ތެރޭގައި ހޮސްޕިޓަލުތަކުގައި އިތުރު 179 މީހުން ކޮވިޑް-19ޖެހިގެން މަރުވެފައިވާކަމަށް ތާފާސް ހިސާބުތަކުން ހާމަކޮށްފައި ވެއެވެ. އިންޓެންސިވް ކެއަރ ޔުނިޓްތަކުގައި ތިބި ކޮވިޑް-19ގެ ބަލިމީހުންގެ ޢަދަދު ވަނީ 3208އަށް އަރައިފައެވެ.
ފްރާންސްގައި ކޮވިޑް ވެކްސިން ބޫސްޓަރ ކެމްޕެއިން މިހާރު ވަނީ ފަށައިފައެވެ. ކޮވިޑްގެ ފަސްވަނަ ރާޅު އެ ޤައުމަށް އަރާނެކަމަށް ލަފާކުރެވޭތީ އެންމެން ވެސް ބައްޔަށް ސަމާލުކަން ދިނުމަށް އެ ގައުމުގެ ހެލްތް ކެއަރއިން ވަނީ އިލްތިމާސްކޮށްފައެވެ.
ފްރާންސްގައި ކޯވިޑް-19ގެ ޙާލަތު ގޯސްވަމުންދާ ނަމަ އެކަން ޙައްލުކުރުމަށް އެޅެން ހުރި ފިޔަވަޅުތައް އަޅަމުންދާނެ ކަމަށް ފަރަންސޭސި ސަރުކާރުން ވަނީ ބުނެފައެވެ. އެހެން ނަމަވެސް ހަރުކަށި، އަދި އާންމުންނަށް ދަތިވާނެ ގޮތަށް ފިޔަވަޅުތައް ނޭޅުމަށް ވެސް އެ ގައުމުގެ ސަރުކާރުން ވަނީ އަމާޒު ހިފައިފައެވެ.
Ads by STO
