"އިންޑިއާ އައުޓް" ކެމްޕެއިން، އެމްޓީޑީއިން ވެސް ކުށްވެރިކޮށްފި
އިދިކޮޅު ޕީޕީއެމް ޕީއެންސީގެ ލީޑަރު އަދި ކުރީގެ ރައީސް,ރައީސް އަބްދުﷲ ޔާމީން އިސްވެ ހުންނަވައިގެން "އިންޑިއާ އައުޓް" ކެމްޕޭން، މޯލްޑިވްސް ތާޑްވޭ ޑިމޮކްރެޓިކް(އެމްޓީޑީން)އިން ވެސް ކުށްވެރިކޮށްފިއެވެ.
އެމްޓީޑީން ނެރުނު ބަޔާނެއްގައި ބުނެފައި ވަނީ ދިވެހިރާއްޖެއަކީ ފަތުރުވެރިކަމާއި އަދި އިގްތިސާދީ އެތައް ރޮނގަކުން އަދިވެސް
އިތުރަށް ކުރިއަށް ދިއުމުގެ ފުރުސަތު އޮތް ރީތި ގައުމެއް ކަމަށެވެ. އަދި ޒަމާނުއްސުރެ ބޮޑެތި ބާރުތަކުގެ މެދުގައި އޮންނަ ވާދަ ވެރިކަމާއި މައްސަލަތަކުގެ ތެރެއަށް ނުވަދެ ހުރިހާ ގައުމުތަކާއި ރަހުމަތްތެރި އިތުބާރު ހިފޭ ހަރުދަނާ ގައުމެއް ކަމަށެވެ.
ދިވެހިރާއްޖެއާއި އިންޑިއާއަކީ ޒަމާންވީ ތާރީޚީ އެތައް ގުޅުމެއް އޮތް އަހުވަންތަ އެކުވެރި ދެގައުމު ކަމަށާއި ސިޔާސީ، އިގްތިސާދީ، ހާރިޖީ އަދި ދިފާއީ އެތައް ކަމެއްގައި ޒަމާނުއްސުރެ އިންޑިއާ އަދި ދިވެހިރާއްޖެ އަބަދުވެސް އެކީގައި މަސައްކަތްކޮށް އިންޑިއާ ކަނޑުގެ ސަލާމަތްތެރިކަން ދަމަހައްޓައިފައިވާ ކަމަށް އެމްޓީޑީން ބުނެއެވެ.
އަދި ރައީސް ޔާމީނުގެ ވެރިކަމުގައި އެމަނިކުފާނު ވެސް ވަނީ އިންޑިއާއާއި ސިޔާސީ، އިގްތިސާދީ އަދި ދިފާއި އެތައް
ގުޅުންތަކެއް ވަރުގަދަކޮށްފައި ކަމަށާއި ރައީސް ޔާމީން ވަނީ އިސްވެ އިންޑިއާއާ އެކީ ގުޅުން ބަދަހި ކުރުމަށް ޓަކައި
އިންޑިއާގައި އެދިގެން ވެރިކަން ލިބުމުގެ ކުރިންނާ އަދި ވެރިކަން ލިބުމުގެ ފަހުން ވެސް އެންމެ ފުރަތަމަ ރަސްމީ ދަތުރުފުޅެއްގައި ވަޑައިގެންނެވީ ވެސް އިންޑިއާއަށް ކަމަށް ވެސް އެ ބަޔާނުގައި ބުނެފައިވެއެވެ.
މީގެ އިތުރުން ރައީސް ޔާމީނުގެ ވެރިކަން ނިމުނު އިރު ދިވެހިރާއްޖެ އޮތީ މުޅި ދުނިޔެއާ އެކަހެރިވެ ޔޫރަޕިއަން ޔޫނިއަންއިން ފިޔަވަޅު އަޅާހިސާބުގައި ކަމަށާއި މިއަދު ރައީސް ޔާމީނު އިދިކޮޅު ލީޑަރުގެ ހައިސިއްޔަތުން ރައްޔިތުންގެ އަޑުއުފުލާ ސަރުކާރު ޖަވާބުދާރީ ކުރުވާތަނެއް ނުފެންނަ ކަމަށް އެމްޓީޑީން ބުނެއެވެ.
އަދި ހިޔާ ފްލެޓުގެ ވެރިންނާއި އަރަބިއްޔާގެ ބެލެނިވެރިން
ވެސް ޖެހުނީ އަމިއްލަޔަށް އަޑުއުފުލާ ހައްގުތަކަށް ވަކާލާތު ކުރަން ކަމަށާއި އަދި މިދިޔަ ދެއަހަރު މުޅި ދުނިޔޭގައި ފެތުރެމުން މިދާ ކޮވިޑް-19 ކާރިސާއާ ބެހޭ ގޮތުން އެއްވެސް ހަމްދަރުދީގެ ބަސްފުޅެއް ވެސް ރައީސް ޔާމީން ވިދާޅެއްނުވާ ކަމަށް ވެސް އެޕާޓީން ބުނެއެވެ.
މީގެ އިތުރުން މުޅި ދުނިޔެއަށާއި ގައުމަށް ދިމާވެފައިވާ އިގްތިސާދީ ދަތި އުދަގޫ ދުވަސްވަރު އެއްވެސް ޒިންމާދާރުކަމެއް ނެތި ސަރުކާރަށް އެއްވެސް އެއްބާރުލުމެއް ނުދީ މިއަދު ރައީސް ޔާމީނު ،އިންޑިއާ އައުޓްގެ މަސައްކަތް ކުރައްވަނީ އިންޑިއާއިން ރާއްޖެއަށް ދެމުން ގެންދާ އެހީތަކުގެ ސަބަބުން ހިތަށް ކެތްނުވެގެން ކަމަށް ވެސް އެ ބަޔާނުގައި ބުނެފައިވެއެވެ.
