ވަޒީފާގެ ކުރިއެރުން ނުލިބޭތީ ސިވިލް ސާވިސްގެ 489 މުވައްޒަފުން ކޯޓަށް
ރާއްޖޭގެ ސިއްހީ ދާއިރާގައި މަސައްކަތްކުރާ ސިވިލް ސާވިސްގެ މުވައްޒަފުންނަށް ވަޒީފާގެ ކުރިއެރުން ނުލިބޭތީ، 489 މުއައްޒަފެއްގެ ފަރާތުން ސިވިލް ކޯޓަށް މައްސަލައެއް ހުށަހަޅައިފިއެވެ.
އެގޮތުން އެ މުއައްޒަފުން މައްސަލަ ހުށަހަޅައިފައި ވަނީ ސިވިލް ސާވިސް ކޮމިޝަން (ސީއެސްސީ)އާއި ހެލްތު މިނިސްޓްރީ އަދި ފިނޭންސް މިނިސްޓްރީއާ ދެކޮޅަށެވެ.
ސިވިލް ސާވިސް މުވައްޒަފުންނަށް އިންސާފު ހޯދައި ދިނުމަށް ހެލްތު ޕްރޮފެޝަނަލް ޔޫނިއަނުން އިސްނަގައިގެން ހުށަހަޅާ މި މައްސަލައިގައި 14 އަތޮޅެއްގައި ސިއްހީ ދާއިރާގައި މަސައްކަތް ކުރާ ސިވިލް ސާވިސްގެ ހުރިހާ މުއައްޒަފުން ހިމެނެއެވެ.
ވަޒީފާގެ ކުރިއެރުން ނުލިބޭތީ އެ މުވައްޒަފުންގެ ފަރާތުން ކޯޓުގައި ވަކާލާތު ކުރަނީ ޕަބްލިކް އިންޓްރަސްޓް ލޯ ސެންޓާ (ޕީއައިއެލްސީ)އިންނެވެ.
2008ވަނަ އަހަރުން ފެށިގެން މިއަދާ ހަމައަށް ވެސް ސިވިލް ސާވިސްގެ ހެލްތު ޕްރޮފެޝަނަލްގެ ފަންނީ ވަޒީފާތަކަށް ކުރިއެރުމެއް ނުލިބޭ ކަމަށާއި ކުރިއެރުން ނުލިބެނީ އެކަން ކުރެވޭނެ އޮނިގަނޑެއް ނެތުމުގެ ސަބަބުން ކަމަށް އެ ލޯ ފާމުން ބުންޏެވެ.
