ރިހިވެލި މައްސަލަ ސުޕްރީމް ކޯޓުގައި އިސްތިއުނާފުކޮށްފި
ރިހިވެލި މައްސަލައިގައި ފްރާންސް ކުންފުންޏަށް ދައުވާއެއް ނުކުރެވޭނެކަމަށް ހައި ކޯޓުން ކަނޑައެޅި މައްސަލަ، ސޭވް ދަ ޑްރީމް ޕްރައިވެޓް ލިމިޓެޑް ލައިބިލިޓީ ކޮމްޕަނީ (ސޭވް ދަ ޑްރީމް ފްރާންސް)ގެ ފަރާތުން މިއަދު ސްޕްރީމް ކޯޓްގައި އިސްތިއުނާފު ކޮށްފިއެވެ.
ހައި ކޯޓުން މީގެ ކުރިން ނިންމީ ރިހިވެލި ރިސޯޓު ހިންގަން ސޭވް ދަ ޑްރީމަށް ހަވާލުކުރި ސަބްލީޒް އެގްރީމަންޓް، އެ ރިސޯޓު ހިންގާ ރަށުގެ ހެޑްލީސް ހައްގުތައް އޮންނަ މާހަލް ޓުއާސްއިން ބާތިލުކުރި މައްސަލައިގައި، ސޭވް ދަ ޑްރީމް ފްރާންސަށް ދައުވާކުރުމުގެ ހައިސިއްޔަތު ލިބިގެން ނުވާ ކަމަށެވެ.
ހައި ކޯޓުގެ ނިންމުން ސޭވް ދަ ޑްރީމްގެ ފަރާތުން ސުޕްރީމް ކޯޓުގައި އިސްތިއުނާފު ކުރަމުން އެދިފައި ވަނީ، ހައި ކޯޓުގެ ޤަޟިއްޔާގައި ސޭވް ދަ ޑްރީމް ފްރާންސްއަށް ދައުވާކުރުމުގެ ހައިސިއްޔަތު އޮތްކަމަށް، ސުޕްރީމުކޯޓުން ކަނޑައަޅައި މި މައްސަލަ އަލުން ބެލުމަށް ހައި ކޯޓަށް ތަޙްވީލު ކުރުމަށެވެ.
ސޭވް ދަ ޑްރީމް ފްރާންސްއިން ބުނާ ގޮތުގައި ހައި ކޯޓުގެ ނިންމުން ރަނގަޅު ނޫނީ 2 ސަބަބަށް ޓަކައެވެ. އެއީ 7 ޖުލައި 2021ގައި، ހައި ކޯޓުގެ އެހެން ބެންޗަކުން، ސޭވް ދަ ޑްރީމް ފްރާންސްއަށް، މި "މައުޟޫޢު" ގައި، ދައުވާކުރުމުގެ ސިފަތު ނުވަތަ ހައިސިއްޔަތު އޮތްކަމަށް ކަނޑައަޅައިފައިވުމުގެ އިތުރުން މަކަރާއި ޙީލަތުގެ މައްސަލަތަކުގައި ބަލަން ޖެހޭނީ، މައްސަލައިގެ ޝަކުލިއްޔަތަށް ނޫންކަމާއި، މައްސަލައިގެ މައުޟޫއަށް ކަމުގައި ސުޕްރީމް ކޯޓުން މީގެ ކުރިން ބުނެފައިވުމެވެ.
ދެން އިސްތިއުނާފުން ނިމުނީ ކިހިނެއް؟ އިސްތިއުނާފު ކޮށްފި ނަމަ ނިމުނު ގޮތެއް އެނގޭނެ.