ހައުޑިގަލާއިން ގދ.އަތޮޅު ކައުންސިލުގެ މުވައްޒަފުން ބޭލުވި ވާހަކަ ފުލުހުން ދޮގުކޮށްފި
ގދ. ހައުޑިގަލާގެ އިންސްޕެކްޝަން ހެދުމަށް ހުވަދު އަތޮޅު ދެކުނުބުރީ އަތޮޅު ކައުންސިލް އިދާރާގެ މުވައްޒަފުން އެ ރަށަށް ގޮސްފައި ވަނިކޮށް، ފުލުހުން ގޮސް މުވައްޒަފުން ރަށުން ބޭލުވި ކަމަށް ދެކެވޭ ވާހަކަތައް ފުލުހުން ދޮގުކޮށްފިއެވެ.
"ދެން"އަށް މަޢުލޫމާތު ދެމުން ފުލުހުން ވިދާޅުވީ ހުވަދު އަތޮޅު ދެކުނުބުރީ އަތޮޅު ކައުންސިލް އިދާރާގެ މުވައްޒަފުން އެ ރަށަށް ގޮސްފައި ވަނިކޮށް، އެ ރަށަށް އަރައިފައި ވަނީ ގަވާއިދާއި ޚިލާފަށް ކަމަށް ބުނެ، ފުލުހުން މެދުވެރިކޮށް އެރަށުން ބާލުވައިފައި ނުވާނެ ކަމަށާއި އެގޮތައް އަމަލުކޮށްފައި ނުވާނެ ކަމަށެވެ.
ހުވަދު އަތޮޅު ދެކުނުބުރީ އަތޮޅު ކައުންސިލް އިދާރާއިން މިއަދު ވިދާޅުވީ އެ އިދާރާއާއި ގދ.ހައުޑިގަލާ ބެލެހެއްޓުމަށް ހަވާލުކުރެވިފައިވާ ފަރާތާ ދެމެދުގެ އެއްބަސްވުމުގެ 8 ވަނަ މާއްދާއާއި އަދި މިނިސްޓްރީ އޮފް ފިޝަރީޒް އެންޑް އެގްރިކަލްޗަރގެ އެދުމުގެ މަތިން ގދ. ހައުޑިގަލާގެ އިންސްޕެކްޝަންއެއް ހެދުމަށް ހުވަދޫ އަތޮޅު ކައުންސިލްގެ ޓީމެއް މިއަދު ގދ.ހައުޑިގަލާގައި ހަރަކާތްތެރިވެފައިވާ ކަމަށެވެ.
މިއަދުގެ އިސްޕެކްޝަން ހެދުމަށް ފުރުމުގެ ކުރިން ސިޓީ އަކުން އެރަށް ބަލަހައްޓާ ފަރާތަށް އެކަން އަންގާފައިވާނެ ކަމަށް އަތޮޅު ކައުންސިލުން ވަނީ ވިދާޅުވެފައެވެ. ގދ. ހައުޑިގަލާ ބަލަހައްޓަމުން ދަނީ ހަވަރު ސްޕޯޓްސްއިންނެވެ.
Ads by STO
