އަކްރަމާ މުހާތަބުކޮށް އޯޓިސްޓިކް މީހެއް ކަމަށް ބުނެވުނީތީ މާފަށް އެދެން: އާދަމް ރަމީޒް
ޕްލޭނިން މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީނަކީ "އޯޓިސްޓިކް ކުއްޖެއްގެ" ގޮތުގައި މިއަދު ސިފަ ކުރެއްވުމަށް ފަހު، މާލޭ ސިޓީ ކައުންސިލްގެ މެދުހެންވޭރު ދާއިރާގެ ކައުންސިލު މެންބަރު އާދަމް ރަމީޒު އެކަމަށް ޓަކައި މައާފަށް އެދިއްޖެއެވެ.
މިއަދު ބޭއްވި މާލެ ސިޓީ ކައުންސިލުގެ ޖަލްސާގައި އާދަމް ރަމީޒް ވިދާޅުވީ، ސަރުކާރުގެ ބައެއް ވުޒާރާތަކުގައި އޯޓިސްޓިކް ކުދިން ތިބޭ ކަމަށާއި އެގޮތުން އަކްރަމް ކަމާލުއްދީނަކީ "އޭގެ ކުއްޖެއް" ކަމަށެވެ.
"މިހެން މިބުނާ ސަބަބަކީ އަޅުގަނޑުމެން ހަމަ މަސައްކަތެއް ކުރަން ފަށާއިރަށް އެ ބޭފުޅާ އެބަ ސިޓީ ފޮނުވައި 'މިކަމެއް ނުވާނެ، އެކަމެއް ނުވާނެ' ކަމަށް ބުނެ. އެބޭފުޅާއަށް ދެން ސިޓީ ލިޔެވެން އޮތީމަ ފޮނުވަނީ" އާދަމް ރަމީޒް ވިދާޅުވެފައިވެއެވެ.
މާލެ ސިޓީގެ މޭޔަރު ޑރ. މުހައްމަދު މުއިއްޒު ވަނީ އާދަމް ރަމީޒްގެ އެ ވާހަކަތައް ހުއްޓުވައިފައެވެ. އަދި އޯޓިސްޓިކް ކުދިންނާ ގުޅުވައި ދެންނެވި ބަސް އަނބުރާ ގެންދެވުމަށް މޭޔަރު އިޝާރާތް ކުރެއްވުމުން، އާދަމް ރަމީޒް ވަނީ އެ ޖަލްސާ ތެރޭގައި ވެސް އެ ބަސްތައް އަނބުރާ ގެންދަވައިފައެވެ.
މިކަމާ ގުޅޭގޮތުން އާދަމް ރަމީޒް މިއަދު ކުރެއްވި ޓްވީޓެއްގައި ވިދާޅުވީ، މިއަދުގެ ކައުންސިލު ބައްދަލުވުމުގައި، އޭނާގެ ވާހަކައިގެ ތެރެއިން އަކްރަމް ކަމާލުއްދީނާ މުހާތަބްކޮށް "އޯޓިސްޓިކް މީހެއް" ކަމަށް ބުނެވުނީތީ މާފަށް އެދޭ ކަމަށެވެ.
"އެއީ އެއްގޮތަކަށް ވެސް އޯޓިސްޓިކް ކުދިންނަށް ކުޑައިމީސް ބަހެއްގެ ގޮތުގައި ދެކެވަޑައި ނުގަތުމަށް އެދެން. ވަރަށް ބޮޑަށް މާފު" އާދަމް ރަމީޒް ވިދާޅުވިއެވެ.
ނަމަވެސް އެކަމާ ގުޅިގެން އާންމުންގެ ފަރާތުން ނުރުހުމާއި ފާޑުކިޔުން އާދަމް ރަމީޒަށް ވަނީ ވަރަށް ބޮޑަށް އަމާޒުވެފައެވެ.
