ފުލުހުން ނުތިބޭ ކުށްވެރިން ރަށްރަށަށް ކަޅި އަޅާ: ސީޕީ
ފުލުހުން ނުތިބޭ ރަށްރަށަށް ކުށްވެރިން އަބަދުވެސް ކަޅި އަޅާ ކަމަށް ޕޮލިސް ކޮމިޝަނަރު މުހައްމަދު ހަމީދު ވިދާޅުވެއްޖެެއެވެ.
އޭނާ މިހެން ވިދާޅުވެފައި ވަނީ ތ.ބުރުނީގެ ޕޮލިސް ޕޯސްޓް ހުޅުވުމުގެ ރަސްމިއްޔާތުގައި ދެއްކެވި ވާހަކައިގައެވެ.
ސީޕީ ހަމީދު ވިދާޅުވީ ރަށުގައި ހިނގާ ކުށްތަކާއި ރަށަށް ތައާރަފްވުމުގެ ފުރުސަތު އޮތް ކުށްތަކުން ރަށުގެ މުޖުތަމައު ސަލާމަތްކޮށް، ރައްކާތެރިކަން ގާއިމްކުރުމަށް ޓަކައި ފުލުހުން ގާއިމްވެ ތިބުމަކީ މުހިންމު ކަމެއް ކަމަށެވެ.
އެގޮތުން ކުށްކުރާ ފަރާތްތައް ފުލުހުން ގާއިމްވެފައި ނުވާ ރަށްރަށަށް އަބަދުވެސް ކަޅިއަޅަމުންދާ ކަމަށާއި ބުރުންޏަކީ އަތޮޅު ފެށޭ ހިސާބުގައި އޮތް ރަށަކަށް ވުމުން އަތޮޅު ފެރީއާއި މާލެއިން ދަތުރުކުރާ ފެރީތައް ބަނދަރުކުރުން ގިިނަކަން ރަށެއްކަން ފާހަގަކުރައްވައި، ބުރުނީގައި ފުލުހުންގެ ޕޯސްޓެއް ހުޅުވިގެން ދިއުމާ އެކު، މަސްތުވާތަކެއްޗާ ސީދާ އަދި ނުސީދާ ގޮތުން ގުޅުންހުރި މައްސަލަތަކާ ދެކޮޅަށް ކުރަމުންދާ މަސައްކަތްތަކަށް އިތުރު ބާރަކަށް ވެގެންދާނެކަމަށް ޔަގީންކުރައްވާ ކަމަށް ސީޕީ ވިދާޅުވިއެވެ.
ސީޕީ ވިދާޅުވީ ބުރުނީގައި ޕޮލިސް ޕޯސްޓެއް ގާއިމްކުރުމުގެ އެންމެ ބޮޑު އެއް ބޭނުމަކީ ރަށުގެ ރައްޔިތުންނަށް ރައްކާތެރި މާހައުލެއް ގާއިމްކޮށްދިނުން ކަމަށެވެ. އަދި ރަށަކީ އަމާން ސުލްހަވެރި ކުޑަ އާބާދީއެއް އޮތް، ކުށްމަދު ރަށަކަށްވީ ނަމަވެސް، ކުށާއި ކުށުގެ ބިރުވެރިކަން އަތޮޅުތަކުގެ ރަށްރަށަށް ފެތުރުމުގެ ކަންކަން ހިނގަމުންދާތީ ބުރުނީއަށް ވެސް އޭގެ ނުރަނގަޅު އަސަރު ފޯރުން އެއީ ފުލުހުން އެކަމަށް ސަމާލުވާންޖެހޭ ކަމެއް ކަމަށް ސީޕީ ވިދާޅުވިއެވެ.
