ލާމު އަތޮޅުގައި ހަރަކާތްތެރި ވޭދަނައިގެ ގޮތުގައި 330 މީހުން!
ލާމު އަތޮޅުގެ ރަށްރަށުން އިތުރު 73 މީހުން ފައްސިވެ އެ އަތޮޅުގައި ހަރަކާތްތެރި ވޭދަނައިގެ އަދަދު 330އަށް އަރައިފިއެވެ.
ލާމު އަތޮޅު ގަމު ރީޖަނަލް ހޮސްޕިޓަލުގެ ތަފާސް ހިސާބުތަކުން ދައްކާ ގޮތުގައި މިހާރު އެ އަތޮޅުގައި ވޭދަނަތައް އެންމެ ގިނަ ރަށަކީ ގަމެވެ. އެގޮތުން ގަމުގައި ހަރަކާތްތެރި ވޭދަނައިގެ އަދަދަކީ 135އެވެ. މުޅި ޖުމުލަ ގަމުން 222 މީހުން ފައްސިވެފައިވާއިރު އެ ރަށުން ބަލި ޖެހުނު 87 މީހަކު މިހާރު ވަނީ ބަލިން ރަނގަޅު ވެފައެވެ. މިއަދު އެ ރަށުން އައު 29 ވޭދަނަ ވަނީ ފެނިފައެވެ.
މިއަދު ދެވަނައަށް އަތޮޅުން އެންމެ ގިނަ މީހުން ފައްސިވީ ހިތަދޫއިންނެވެ. އެގޮތުން ހިތަދޫން އިތުރު 20 މީހަކު ވަނީ ފައްސިވެފައެވެ. މި އަދަދާ އެކު ހިތަދޫގައި ހަރަކާތްތެރި ވޭދަނަތަކުގެ އަދަދަކީ 56އެވެ. އެ ރަށުން މިހާތަނަށް 84 މީހަކަށް ބަލި ޖެހިފައިވާއިރު 28 މީހަކު ބަލިން ރަނގަޅުވެފައިވެއެވެ.
މީގެ އިތުރުން މިއަދު އެ އަތޮޅު ފޮނަދޫން 07 މީހުން ފައްސިވެފައިވާއިރު ފޮނަދޫން ފައްސިވީ މީހުންގެ ޖުމުލަ އަދަދު ވަނީ 115އަށް އަރައިފައެވެ. އެ ރަށުން 55 މީހުން ބަލިން ރަނގަޅުވެފައިވާއިރު ހަރަކާތްތެރި ވޭދަނައިގެ އަދަދު ހުރީ 60ގައެވެ.
މާބައިދޫން ވެސް މިއަދު ވަނީ އައު 05 ވޭދަނަ ފެނިފައެވެ. އެއާއެކު އެރަށުގައި ބަލި ޖެހުނު މީހުންގެ އަދަދު 32އަށް އަރައިފައިވާއިރު 11 މީހަކު ބަލިން ރަނގަޅުވެފައިވެއެވެ. މިހާރު އެރަށުގައި ބަލި ޖެހިފައި ތިބީ 21 މީހުންނެވެ.
މާވަށުން މިއަދު އިތުރު ހަތަރު މީހަކު ވަނީ ފައްސިވެފައިވެއެވެ. އެގޮތުން އެރަށުގައި ބަލި ޖެހުނު މީހުންގެ އަދަދު ވަނީ 21އަށް އަރައިފައެވެ. ނަމަވެސް ބަލި ޖެހުނު މީހުންގެ ތެރެއިން 17 މީހަކު ބަލިން ރަނގަޅުވެ އެ ރަށުުގައި މިހާރު ބަލިޖެހި، އެއްކޮށް ރަނގަޅުނުވެ ތިބީ 04 މީހުންނެވެ.
އެ އަތޮޅު ކަލައިދޫން މިއަދު އެއްވެސް މީހަކު ކޮވިޑަށް ފައްސިވެފައެއް ނުވެއެވެ. އެހެން ނަމަވެސް އެ ރަށުގައި ހަރަކާތްތެރި ވޭދަނައިގެ ގޮތުގައި 03 މީހުން އެބަތިއްބެވެ. ދަނބިދޫގައި ކޮވިޑް ޖެހުނު މީހުންގެ ޖުމުލަ އަދަދަކީ 26އެވެ. އަދި މިވަގުތު އެ ރަށުގައި ބަލި ޖެހިފައި ތިބީ 13 މީހުންނަށެވެ. ކުނަހަންދޫން ބައްޔަށް ފައްސިވީ ތިން މީހުންނެވެ. މިހާރު އެ ރަށުގައި ބަލިޖެހިފައި ހުރީ 09 މީހުންނަށެވެ.
އެ އަތޮޅު މާމޭންދޫން އަލަށް އެކަކު ފައްސިވެފައިވާއިރު އެ ރަށުގައި ހަރަކާތްތެރި ވޭދަނައިގެ ގޮތުގައި 18 މީހުން އެބަތިއްބެވެ. އިސްދޫން ވެސް އެކަކު ވަނީ ފައްސިވެފައެވެ. އެ ރަށުގައި 11 މީހުންނަށް މިހާރު ބަލި ޖެހިފައި އެބަތިއްބެވެ. މުންޑޫން އެއްވެސް މީހަކު ފައްސިވެފައި ނުވާ އިރު ހަރަކާތްތެރި ވޭދަނައެއް ވެސް އެ ރަށުގައި ނެތެވެ.
ލ.އަތޮޅުގެ ރަށްރަށުން ޖުމުލަ 02 މީހަކު ވަނީ ކޮވިޑް ޖެހިގެން މި އަހަރު ނިޔާވެފައެވެ. އެއީ އިސްދޫން އެކަކާއި ފޮނަދޫން މީހެކެވެ.
