ރިޔާސީ ބަޔާން: ޝަރުތު ފުރިހަމަ ނުވާ ބޭކާރު ސިޔާސީ ވާހަކަތަކެއް

2022ވަނަ އަހަރަށް ރައްޔިތުންގެ މަޖިލީހުގެ ޖަލްސާތައް ފެށުމުގެ ގޮތުން ރައީސް އިބްރާހިމް މުހައްމަދު ޞާލިހު އިއްވެވި ރިޔާސީ ބަޔާނަށް އިދިކޮޅު ކޯލިޝަންގެ ފާޑުކިޔުންތައް އަމާޒުވެއްޖެއެވެ.

Ads by Sosun Fihaara

މިއަހަރުގެ ރިޔާސީ ބަޔާން އިއްވަވައިފައި ވަނީ ކޮމަންޑޫ ދާއިރާގެ ބައި އިލެކްޝަނާ ގާތް ވެފައިވަނިކޮށެވެ. އެހެންކަމުން އިދިކޮޅުން ސިފަކުރަނީ ރައީސްގެ ބަޔާނަކީ ސިޔާސީގޮތުން ތާއީދު ހޯއްދެވުމަށް ބައްޓަން ކޮށްފައިވާ ބަޔާނެއްގެ ގޮތުގައެވެ.

މިބަޔާނުގައި މިއަހަރަށް ރާވައިފައިވާ ގިނަ ކަންކަން ރައީސް ޞާލިހު ބަޔާންކޮށްދެއްވިއެވެ. އެގޮތުން މެއި މަހުގެ ތެރޭގައި ތައުލީމީ ދާއިރާގެ މުވައްޒަފުންގެ މުސާރަ ބޮޑުކުރުމަށް ނިންމައިފައިވާ ކަމަށާއި، ސިއްހީ ދާއިރާގެ ތަރައްގީގެ މަޝްރޫއުތަކުގެ އިތުރުން ނުކުޅެދުންތެރިކަން ހުންނަ ކުދިންނަށް ދޭ އިނާޔަތްތައް ބޮޑުކުރުމަށް ނިންމަވައިފައިވާކަން ރައީސް ޞާލިހު ވަނީ ވިދާޅުވެފައެވެ.

ރައީސްގެ މިވާހަކަތަކަށް ރައްދުދެއްވަމުން ނައިފަރު ދާއިރާގެ މަޖިލިސް މެމްބަރު އަދި ޕީޕީއެމްގެ ނައިބުރައީސް އަހުމަދު ޝިޔާމް ވިދާޅުވީ ގާނޫނުއަސާސީގައިވާ ގޮތުން ރިޔާސީ ބަޔާނުގައި ގައުމުގެ ހާލަތު ބަޔާންކޮށްދޭން ޖެހޭ ކަމަށެވެ. އެހެން ނަމަވެސް ރައީސް ޞާލިހުގެ ބަޔާނުން އެއިން އެއްވެސް ކަމެއް ސާފު ނުވާކަމަށް ޝިޔާމް ވިދާޅުވިއެވެ.

"ހައްތަހާ ވެސް ސިޔާސީ ގޮތުން ކުރަން ބޭނުންވާ ކަންތައްތައް، ވޯޓު ހޯދުން ނޫނީ އިންތިހާބެއް ކާމިޔާބު ކުރުމަށް ޓަކައި ވައުދުތަކެއް އަނެއްކާ ވެސް އެވީ."

- މެމްބަރު އަހުމަދު ޝިޔާމް

ޝިޔާމް ވިދާޅުވީ ކުރިން ރައީސް ދެއްކެވި ވާހަކަތަކަށް ވެސް ރިޔާސީ ބަޔާނުގައި އެއްވެސް ވަރަކަށް ރިއާޔަތްކޮށްފައި ނުވާ ކަމަށެވެ. އަދި ކުރިން ކޮށްދެއްވަން ވިދާޅުވި ކަންކަން ކޮށްދެވުނީ ކިހާ ވަރަކަށްކަމެއް ވެސް ވިދާޅުވެ ނުދެއްވުނުކަމަށް ޝިޔާމް ވިދާޅުވިއެވެ. ޝިޔާމް ސިފަކުރެއްވީ ރައީސްގެ ބަޔާނަކީ ކޮމަންޑޫ ދާއިރާގެ ބައި އިލެކްޝަންގެ ކެމްޕެއިނަށް އަމާޒުކޮށް އިއްވެވި ބަޔާނެއްގެ ގޮތުގައެވެ.

މީގެ އިތުރުން އިދިކޮޅު ކޯލިޝަނާ ގުޅިވަޑައިގެން ހުންނެވި މިސަރުކާރުގެ ފުރަތަމަ ޓެކްނޮލޮޖީ މިނިސްޓަރު މުހައްމަދު މަލީހު ޖަމާލު ވިދާޅުވީ ހިލޭ ޑިގްރީ ރައްޔިތުންނަށް ދިނުމުގެ ކުރިން ހިލޭ ޑިގްރީގެ ދަށުން ޑިގްރީއެއް ނަންގަވަންވީ ރައީސް ޞާލިހު ކަމަށެވެ.

"ނުކިޔަވާ މިކަމެއް ނުވާނެ. ނުކިޔަވާ ގައުމު ނުހިންގޭނެކަން ފާއިތުވި ހަތަރު އަހަރުން ސާބިތުވެއްޖެ"

- މުހައްމަދު މަލީހު ޖަމާލު

އިދިކޮޅުން ވަނީ ރައީސް ޞާލިހުގެ ރިޔާސީ ބަޔާން ޕްރޮމޯޓު ކުރުމަށް ބައެއް ނޫސްތަކަށް ފަންސަވީސް ހާހާއި ބައިލައްކަ ރުފިޔާއާއި ދެމެދުގެ އަދަދަކަށް ސަރުކާރުން ދިންކަމުގެ ތުހުމަތުކޮށްފައެވެ. އެގޮތުން ކުރީގެ އިކޮނޮމިކް މިނިސްޓަރު އަދި މާވަށު ދާއިރާގެ މެމްބަރު މުހައްމަދު ސައީދު ވިދާޅުވީ އެ ފައިސާ ސަރުކާރުން ދެނީ ރައްޔިތުންގެ ޓެކްސް ފައިސާއިން ކަމަށެވެ. އަދި ވިދާޅުވީ މިވަރުން ހަ ބިލިއަން ޕްރިންޓު ކުރިޔަސް ހުސްވާނެ ކަމަށާއި ނަތީޖާ ނެރެފި ނަމަ އެވާހަކަ ފައިސާ ނުދިނަސް ނޫސްތަކުން ލިޔާނެ ކަމަށެވެ.