ނަޝީދު މިހާރު ބޭނުންވެލައްވަނީ 30 ޕަސެންޓްގެ ވެރިކަން: އަލްހާން
ރައްޔިތުންގެ މަޖިލީހުގެ ރައީސް މުހައްމަދު ނަޝީދު މިހާރު ބޭނުންފުޅުވެލައްވަނީ 30 ޕަސެންޓްގެ ވެރިކަން ކަމަށް އެޕާޓީގެ ކުރީގެ ނައިބު ރައީސް، އަދި ރައްޔިތުންގެ މަޖިލީހުގެ ފޭދޫ ދާއިރާގެ ކުރީގެ މެމްބަރު އަލްހާން ފަހުމީ ވިދާޅުވެއްޖެއެވެ.
އޭނާ މިހެން ވިދާޅުވެފައި ވަނީ މިއަދު ކުރެއްވި ޓްވީޓެއްގައެވެ. އަލްހާން މިހެން ވިދާޅުވެފައި ވަނީ ރައީސް ނަޝީދަށް ތާއީދުކޮށް ޓްވީޓް ކުރުމުގައި، މީހުންގެ ސަމާލުކަން ހޯދައިފައިވާ "ހަސަން ކުރުސީ" ޓްވިޓަރ އެކައުންޓުން ކުރި ޓްވީޓެއް ރީޓްވީޓް ކުރައްވަމުންނެވެ.
ހަސަން ކުރުސީގެ ޓްވީޓުގައި ވަނީ އެމްޑީޕީއަކީ "އެމީހުންގެ" މުދަލެއް ކަމަށާއި، އެއީ ވަރަށް ބުރަ މަސައްކަތުން އުފެއްދި އަގުހުރި މުދަލެއް ކަމަށެެވެ.
"އެމުދަލުގެ ވެރިފަރާތަކީ އަޅުގަނޑުމެން. އާދެ. އެމްޑީޕީގެ ފަލްސަފާ ގަބޫލުކުރާ އާންމު މެންބަރުން." އެ ޓްވީޓުގައިވެއެވެ.
ބެލެވޭ ގޮތުގައި މި ޓްވީޓު ގުޅިފައި ވަނީ އަންނަ އޭޕްރީލްމަހުގެ 16ވަނަ ދުވަހު ބޭއްވުމަށް ހަމަޖެހިފައިވާ އެމްޑީޕީގެ ޗެއާޕާސަންގެ އިންތިޚާބާއެވެ. މި އިންތިހާބުގައި ވާދަކުރައްވާ، މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީ(އިންތި)އަށް ހަސަން ކުރުސީގެ ޓްވިޓަރއިން އަންނަނީ ކެމްޕެއިން ކޮށްދެމުންނެވެ. އެގޮތުން އެމްޑީޕީ ސަލާމަތް ކުރަން އިންތި ހޮވަން ޖެހޭ ކަމަށް ވެސް މީގެ ކުރިން ބުނެފައިވެއެެވެ.
ޗެެއާޕާސަންގެ އިންތިހާބާ ދިމާކޮށް، އެމްޑީޕީގެ ތެރޭގައި ދެ ފެކްޝަން އޮތް މިންވަރު ހާމަވަމުންދާ ކަމަށް ބައެއް ފަރާތްތަކުން ބުނަން ފަށައިފައިވާ އިރު، ރައީސް ނަޝީދު ވެސް ކުރިއަށް އޮތް ރިޔާސީ އިންތިޚާބުގައި ވާދަ ކުރެއްވުމަށް ނުވަތަ ރާއްޖޭގެ ވެރިކަމުގެ ނިޒާމު ބަދަލު ކުރުމުގެ ވާހަކަތައް އަނެއްކާ ވެސް ވަނީ ފައްޓަވައިފައެވެ.
އެގޮތުން ރިޔާސީ އިންތިހާބުގައި 30 ޕަސެންޓް ލިބޭ ބޭފުޅަކަށް ވެރިކަން ލިބޭ ގޮތަށް ހަދައި، ވެރިކަމުގެ ނިޒާމު ބަދަލު ކުރުމަށް ނަޝީދު ދާދި ފަހުން ވަނީ ހުށަހަޅުއްވައިފައެވެ. އެމަނިކުފާނު ދެކެވަޑައިގަންނަވާ ގޮތުގައި، މިއީ އެމްޑީޕީ އަބަދު ވެރިކަމުގައި ދެމިއޮތުމަށް ޓަކައި ކުރުން މުހިންމު ކަމެކެވެ.
