ކީރިތި ނަބިއްޔާގެ ސުންނަތުން އައިސްފައިވާ މުހިންމު ދުޢާއެއް!
މާތްﷲ ރުއްސުން ލެއްވި އުތުބާ ބިން މާލިކްގެ އަރިހުން ރިވާވެގެން އައިސްފައި ވެއެވެ. ރަސޫލުﷲ ޞައްލަﷲ ޢަލައިހި ވަސައްލަމް މި ދުޢާ ވިދާޅުވިއެވެ.
اللَّهُمَّ جَنِّبْنِي مُنْكَرَاتِ اَلْأَخْلَاقِ، وَالْأَهْوَاءِ، وَالْأَعْمَالِ، وَالْأَدْوَاءِ
މާނައީ:
اللَّهُمَّ جَنِّبْنِي : އޭ ހައްދަވާ ބޮޑުކުރެއްވި އިލާހެވެ! މިއަޅާ ދުރުކުރައްވާންދޭވެއެވެ.
مُنْكَرَاتِ اَلْأَخْلَاقِ: އެންމެހައި ނުބައި އަޚުލާޤުން
وَالْأَهْوَاءِ، : އަދި އެންމެހައި ނުބައި އެދުންތަކުން
وَالْأَعْمَالِ، : އަދި އެންމެހައި ނުބައި ޢަމަލުތަކުން
وَالْأَدْوَاءِ : އަދި އެންމެހައި ނުބައި ބަލިތަކުން
މިއީ ރަސޫލުﷲ ޞައްލަﷲ ޢަލައިހި ވަސައްލަމްގެ އަރިއަހުން އައިސްފައިވާ ވަރަށް މުހިންމު ދުޢާއެކެވެ. ދުޢާ އިޖާބަ ކުރެއްވޭ ވަގުތުތަކުގައި ޚާއްޞަކޮށް ކިޔުން މުހިންމު ދުޢާއެކެވެ. އެ ގޮތުން ހެނދުނުގެ ވަގުތުތަކުގައްޔާއި ބަންގިއާއި ގަމަތާ ދެމެދުގައްޔާއި ދަމުނަމާދުގެ ސަޖިދައިގައި ވެސް ކިޔުން ވަރަށް މުހިންމު ދުޢާއެކެވެ.
މި ދުޢާގައި ހިމެނިފައި މި ވަނީ އިންސާނަކަށް ދެދުނިޔޭގެ ބާއްޖަވެރިކަމަށް ބޭނުންވާ ވަރަށް މުހިންމު ކަންކަމެވެ. ތިމާގެ ކިބައިގައި ހުރިނަމަ ހުރި ގޯސް ސިފަޔަކުން ދުރުކޮށްދިނުމާއި ހަވާނަފުސްގެ އެންމެހައި ނުބައި އެދުންތަކާއި ނުބައި އަމަލުތަކުގެ އިތުރުން ފުރިހަމަ ޞިއްޙަތަކަށް ބޭނުން ވާނޭ ނުބައި ބަލިތަކުން ދުރުކޮށްދިނުމަށް މި ދުޢާގައި އެ ވަނީ ހިމެނިފައެވެ.
