ހަނގުރާމައަށް ދިޔަ އަންހެނަކާއި އޭނާގެ 4 ދަރިން ރާއްޖެ ގެނެސްފި
ރާއްޖެއިން ބޭރުގެ ހަނގުރާމަވެރި ސަރަހައްދުތަކަށް ގޮސް ހާލުގައި ޖެހުނު ދިވެހި އާއިލާއެއް މިއަދު ރާއްޖެ ގެެނެސްފިއެވެ.
ހޯމް މިނިސްޓްރީން ނެރުނު ނޫސްބަޔާނެއްގައި ވިދާޅުވީ، ރާއްޖެ ގެނެސްފައިވާ އަންހެނާއަކީ ހަނގުރާމައަށް ގޮސް، ހާލުގައި ޖެހިގެން ސަރުކާރުގެ އެހީތެރިކަމަށް އެދިފައިވާ ފަރާތެއް ކަމަށެވެ. އަދި އޭނާއާ އެކު އެ މީހާގެ 18 އަހަރުން ދަށުގެ ތިން ދަރިން ވެސް ގެނެސްފައިވާ ކަމަށް ވެސް ވިދާޅުވިއެވެ.
މިނިސްޓްރީން އިތުރަށް ވިދާޅުވީ، މިފަދަ ސަރަހައްދުތަކުން ރާއްޖެއަށް އަންނަ ފަރާތްތައް ޒިންމާދާރު ބައެއްގެ ގޮތުގައި އަލުން މުޖުތަމައަށް ނެރެން މަސައްކަތް ކުރަމުން އަންނަ ކަމަށެވެ. އަދި މީގެ ކުރިން އެފަދަ އިންތިޒާމެއް ނެތަސް، މިއަދުގެ ސަރުކާރުން އެކަން ކުުރަމުން އަންނަ ކަމަށް ވިދާޅުވިއެވެ.
"މިފަދަ ޙާލަތްތަކުގައި ވިކްޓިމައިޒްވާ އަންހެނުންނާއި ކުޑަކުދިންނަށް ބޭނުންވާ ދީނީ، އިޖުތިމާއީ އަދި ނަފްސާނީ ފަރުވާ ދެވޭނެހެން ގާނޫނުތަކާއި ގަވާއިދުތައް އިސްލާހުކޮށް އެކަމަށް ބޭނުންވާ މަރުކަޒުތަކާއި ވަސީލަތްތައް ޤާއިމުކޮށް އެ ނިޒާމު ހިންގާނެ މީހުން ތަމްރީނުކުރުމުގެ މަސައްކަތް ވަނީ ކުރެވިފައި،" އެ ބަޔާނުގައި ވިދާޅުވިއެވެ.
މީގެ އިތުރުން، މީގެ އަހަރުތަކެއް ކުރިން ރާއްޖެއިން ބޭރުގެ ހަނގުރާމަވެރި ސަރަޙައްދުތަކަށް ދިވެހި ފިރިހެނުންނާ އެކު ދަތުރުކުރި އެ ފަރާތްތަކުގެ އަނބިންނާއި އެފަދަ އާއިލާތަކަށް ނިސްބަތްވާ ކުޑަކުދިން، ހަނގުރާމާގައި ހާލުގައި ޖެހިފައިވާ މީހުން ބަލަހައްޓާ ކޭމްޕުތަކާއި އެފަދަ އެހެން ތަންތަނުގައި ހާލުގައި ޖެހި ފުރާނަޔަށް ނުރައްކާވާ ޙާލަތަށް ގޮސްފައިވާކަން ފާހަގަ ކުރަމުން، އެ ފަދަ ފަރާތްކަށް ރައްކާތެރިކަން ހޯދައިދިނުމަށް ގިނަ މަސައްކަތް ތަކެއް ކުރަމުން އަންނަ ކަމަށް ވެސް ފާހަގަ ކޮށްފައިވެއެވެ. ހަމައެއާ އެކު، އެފަދަ ފަރާތްތައް އަނބުރާ މުޖުތަމައަށް ނެރުމަކީ ސަރުކާރުގެ ރިޔާސީ ވައުދެއްކަން ވަނީ ފާހަގަ ކުރައްވައިފައެވެ.
