ވައަތުން ކާތީ ކައިވެންޏަށް ދެކޮޅު ހަދައިފި
ކައިވެންޏަށް ދެކޮޅު ހެދުމުގައި އިންޑިއާ މީހުންނަކީ އަބަދުވެސް ވަރަށް ތަފާތު ސަބަބުތައް ނުވަތަ "ބަހަނާތައް" ދައްކާ ބައެއް ކަމުގައި ގިނަ މީހުން ފާހަގަ ކުރެއެވެ.
އެ ގޮތުން އިންޑިއާގެ އެއްބައި ފިރިހެނުން ކައިވެންޏަށް ދެކޮޅު ހަދަނީ، ކައިވެނީގެ ކުރިން އަންހެންމީހާގެ އާއިލާގެ ފަރާތުން ފައިސާއާއި މުދާ ނުލިބުމުންނެވެ. އަނެއް ބަޔަކު ދެކޮޅު ހަދަނީ އަންހެންމީހާ ހުންނަ ކުލައަށް ނުވަތަ ސިފައަށް ބަލައިފައެވެ.
ނަމަވެސް މި ފަހަރު، އިންޑިއާ މީހަކު ކައިވެންޏަށް ދެކޮޅު ހަދައިފައި މިވަނީ، އޭނާ ކައިވެނި ކުރަން އުޅުނު އަންހެންމީހާ ކަނީ ވައަތުންކަން އެނގުމުންނެވެ.
ރިޕޯޓުތަކުން ބުނާ ގޮތުގައި ކަރްނާޓަކާއަށް ނިސްބަތްވާ އެ ފިރިހެންމީހާއަށް އޭނާ ކައިވެނި ކުރަން އުޅުނު އަންހެންމީހާ ކަނީ ވައަތުންކަން އެނގުނީ ވެސް އެމީހުން ކައިވެނިކުރަން ފައްޅިއަށް ގޮސް ތިއްބައެވެ.
ކައިވެނި ކުރުމުގެ ކުރިން ކާއެއްޗެހި ގެނައުމުން، އަންހެންމީހާ ކާން ފެށީ ވައަތުންނެވެ. އެ މަންޒަރު ފެނުމުން އެ ފިރިހެންމީހާ ވަރަށް ބޮޑަށް ހިތްހަމަނުޖެހި، އެ ކައިވެނި ނުކުރާނެ ކަމަށް ބުންޏެވެ. އަންހެންމީހާ ވައަތުން ކަނީ އޭނާގެ ކަނާއަތުގައި ހުރި މައްސަލައެއްގެ ސަބަބުން ކަމަށް އަންހެންމީހާގެ އާއިލާއިން ފަހުން ވިސްނައި ދިނުމުން ވެސް ފިރިހެންމީހާ ބުނީ، އެ ކައިވެނި ނުކުރާނެ ކަމަށާއި ވައަތުން ކެއުމަކީ އޭނާގެ އާއިލާއަށް އިހުތިރާމު ނުކުރުން ކަމަށެވެ.
ފިރިހެންމީހާގެ އެ ނިންމުމުގެ ސަބަބުން އަންހެންމީހާގެ އާއިލާއިން އެކަން ފުލުހުންނަށް ރިޕޯޓު ކުރިއެވެ. އަދި ފުލުހުން ފިރިހެންމީހާއާއި އޭނާގެ އާއިލާ ކައުންސެލިންގ ސެޝަނަކަށް ގެންގޮސް އެމީހުންނަށް ވިސްނައިދިން ކަމަށް ވެސް ރިޕޯޓުތަކުން ބުނެއެވެ.
ކައުންސެލިންގ ދިނުމަށް ފަހު ފިރިހެންމީހާއާއި އޭނާގެ އާއިލާ ވަނީ އެ ކައިވެންޏަށް އެއްބަސްވެފައެވެ.
