އިންޑިއާގެ އެކްސްޓާނަލް އެފެއާޒް މިނިސްޓަރު މިއަދު އައްޑުއަށް ވަޑައިގަންނަވަނީ
އިންޑިއާގެ މިނިސްޓަރ އޮފް އެކްސްޓާނަލް އެފެއާޒް ޑރ. އެސް ޖައިޝަންކަރު ރަސްމީ ދަތުރުފުޅެއްގައި މިއަދު އައްޑުއަށް ވަޑައިގަންނަވާގޮތަށް ހަމަޖެހިއްޖެއެވެ.
މި ދަތުރުފުޅުގައި ދެ ޤައުމުގެ ދެމެދުގައި ރަސްމީ ވާހަކަފުޅުތައް ބާއްވަވާނެއެވެ. އަދި މިނިސްޓަރ އޮފް އެކްސްޓަރނަލް އެފެއާޒް، ރާއްޖޭގެ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްގެ އަރިހަށް އިޙްތިރާމްގެ ޒިޔާރަތެއް ކުރައްވާނެއެވެ. އަދި އިންޑިއާގެ ހިލޭ އެހީގެ ދަށުން އައްޑޫ ސިޓީގައި ހިންގާ ނެޝަނަލް ކޮލެޖް އޮފް ޕޮލިސިންގ އެންޑް ލޯ އެންފޯސްމަންޓް މަޝްރޫޢުތައް އިފްތިތާޙް ކުރުމުގެ ރަސްމިއްޔާތުގައި މިނިސްޓަރ ޖައިޝަންކަރު ބައިވެރިވެވަޑައިގަންނަވާނެއެވެ.
މިއީ 2019ވަނަ އަހަރުގެ މެއި މަހު މިނިސްޓަރުކަމާ ހަވާލުވެވަޑައިގެންނެވި ފަހުން މިނިސްޓަރު ޑރ ޖައިޝަންކަރު ރާއްޖެއަށް ކުރައްވާ ތިންވަނަ ދަތުރުފުޅެވެ.
ޖައިޝަންކަރުގެ ދަތުރުފުޅާ ގުޅޭ ރަސްމީ ބައްދަލުވުންތަކާއި އެހެނިހެން ހަފްލާތައް އައްޑޫގައި ބާއްވާގޮތަށް ހަމަޖެހިފައިވާ އިރު މިކަން ހިމެނިގެންދަނީ މިފަދަ އިހްތިފާލްތަކެއް މާލެއިން ބޭރުގައި ބާއްވާ ފުރަތަމަ ފަހަރުކަމަށެވެ.
