މިސްކިތްތަކުގެ މަރާމާތަށް 15 މިލިއަން ރުފިޔާ ހޭދަކޮށްފި
މިސްކިތްތަކުގެ އާބާތުރަ ފިލުވުމަށް ޓަކައި މިއަހަރު 15 މިލިއަން ރުފިޔާ، ދައުލަތުގެ ބަޖެޓުން ހަރަދު ކޮށްފައިވާކަމަށް އިސްލާމިކް މިނިސްޓަރު ޑރ.އަހުމަދު ޒާހިރު ވިދާޅުވެެއްޖެއެވެ.
މިނިސްޓަރު މިހެން ވިދާޅުވެފައި ވަނީ ކުރިއަށް އޮތް ރަމަޟާން މަހަށް އިސްލާމިކް މިނިސްޓްރީން ވަމުން އަންނަ ތައްޔާރީތަކާ ގުޅޭ މައުލޫމާތު ހިއްސާ ކުރުމަށް މިއަދު ބޭއްވި ނޫސްވެރިންގެ ބައްދަލުވުމުގައި ދެއްކެވި ވާހަކައިގައެވެ.
ދައުލަތުގެ ބަޖެޓުގެ އިތުރުން، މިސްކިތު ފަންޑުން ވެސް 6.8 މިލިއަން ރުފިޔާ، މި މަސައްކަތަށް ހޭދަ ކުރެވުނުކަން މިނިސްޓަރު ފާހަގަކުރެއްވިއެވެ.
"އަޅުގަނޑުމެން މި މަސައްކަތްތައް ކުރިއަށް ގެންގޮސް، ނިންމާލަން އަމާޒު ހިފައިފައި ހުރީ ރަމަޟާން މަހާ ހިސާބަށް. އެކަމަކު ބައެއް މިސްކިތްތަކުގެ މަރާމާތުތައް އެއްކޮށް ނުނިމުމަކީ އެކަށީގެންވާ ކަމެއް. އަޅުގަނޑުމެން ބައެއް މިސްކިތްތައް މަރާމާތު ކުރަމުން ދިޔައިރު، އިސްލާމީ މަރުކަޒުގެ މަރާމާތުގެ ކަންތައްތައް ވެސް ކުރިއަށް ގެންދިޔައިން." މިނިސްޓަރު ވިދާޅުވިއެވެ.
މިނިސްޓަރު ވިދާޅުވީ ބައެއް މިސްކިތްތަކުގެ މަރާމާތުގެ މަސައްކަތް ރޯދައަށް ނުނިމުނު ނަަމަވެސް، އިސްލާމީ މަރުކަޒު މަރާމާތުކުރުމުގެ މަސައްކަތް ގާތްގަނޑަކަށް ނިމިފައިވާ ކަަމަށެވެ.
މިނިސްޓަރު އިތުރަށް ވިދާޅުވި ގޮތުގައި، ރަމަޟާން މަސް ބައްދަލު ކުރާއިރު، އިސްލާމިކް މިނިސްޓްރީގެ އެންމެ ބޮޑު އަމާޒަކީ ރައްޔިތުންނަށް ބޭނުންވާ ދީނީ މައުލޫމާތުތައް ފޯރުކޮށްދީ، ރަމަޟާންމަހުގެ އަޅުކަން ފަސޭހައިން ކުރެވޭނެ ގޮތްތަކެއް ހަމަޖެއްސުން ކަމަށެވެ.
