އަލްޙާފިޡް އަޙްމަދު ނަބީޙްއާ ބައްދަލުކުރައްވައި ނައިބު ރައިސް ހިތްވަރުދެއްވައިފި
ޔޫއޭއީގައި ކުރިޔަށް ދިޔަ 2022ވަނަ އަހަރުގެ ދުބާއީ އިންޓަރނޭޝަނަލް ޤުރުއާން މުބާރާތުގައި ބައިވެރިވެ ރާއްޖެ ތަމްސީލުކުރި އަލްޙާފިޡް އަޙްމަދު ނަބީޙް ޢަބްދުލްޤާދިރާ، ރައީސުލްޖުމްހޫރިއްޔާގެ ނައިބު ފައިޞަލް ނަސީމް ބައްދަލުކުރައްވައި މަރުޙަބާ ވިދާޅުވެއްޖެއެވެ.
މިއަދު ހެނދުނު ރައީސުލްޖުމްހޫރިއްޔާގެ އޮފީހުގައި ބޭއްވެވި މި ބައްދަލުކުރެއްވުމުގައި، މިނިސްޓަރ އޮފް އިސްލާމިކް އެފެއާޒް ޑޮކްޓަރ އަޙްމަދު ޒާހިރާއި، އަލްޙާފިޡް އަޙްމަދު ނަބީޙް ޢަބްދުލްޤާދިރުގެ މަންމަ އާމިނަތު މުޙައްމަދާއި، ބައްޕަ ޢަބްދުލްޤާދިރު ޤާސިމް ވަނީ ބައިވެރިވެވަޑައިގެންފައެވެ.
މި ބައްދަލުކުރެއްވުމުގައި ނައިބު ރައީސް ވިދާޅުވީ އަލްޙާފިޡް އަޙްމަދު ނަބީޙަކީ ނަމޫނާ ކުއްޖެއް ކަމަށެވެ. ނަބީޙަށް ކީރިތި ޤުރުއާން ކިޔެވުމުގެ ރޮނގުން އިތުރަށް ކުރިޔަށް ދިޔުމަށް ނައިބު ރައީސް ވަނީ ހިތްވަރުދެއްވައިފައެވެ. އަދި ކުރިޔަށް އޮތް ތަނުގައި ސަރުކާރުގެ ތެރެއިން ހުރި މިފަދަ ފުރުޞަތުތައް ފަހިކުރުމަށް މަސައްކަތް ކޮށްދެއްވާނެކަމަށް ވެސް ވިދާޅުވިއެެވެ.
މި ބައްދަލުކުރެއްވުމުގައި ނަބީޙުގެ ބެލެނިވެރިން ވަނީ ދުބާއީ އިންޓަރނޭޝަނަލް ޤުރުއާން މުބާރާތުގައި ނަބީޙު ބައިވެރިވުމަށް ކުރި ދަތުރުގެ ތަޖުރިބާ ނައިބު ރައީސްއާ ޙިއްޞާކުރައްވައިފައެވެ.
Ads by STO
