އަންމަޓީ ދޫކޮށްލި މައްސަލަ ބަލަން ސުޕްރީމް ކޯޓުން ހުކުމްކޮށްފި
ސީލައިފް ގްލޯބަލްގެ މެނޭޖިން ޑިރެކްޓަރު އަހުމަދު މޫސާ މުހައްމަދު (އަންމަޓީ) ދޫކޮށްލަން ކްރިމިނަލް ކޯޓުން ހުކުމް ކުރި މައްސަލަ ހައި ކޯޓުން ބަލަން މިއަދު ސުޕްރީމް ކޯޓުން ހުކުމްކޮށްފިއެވެ.
ފްލެޓު އަޅައިދޭނެ ކަމަށް ބުނެ ގިނަ ބައެއްގެ އަތުން ފައިސާ ނެގުމަށް ފަހު ފިލިކަމަށް ބުނާ މައްސަލައެއްގައި ހައްޔަރުކުރި އަންމަޓީ ދޫކޮށްލަން ކްރިމިނަލް ކޯޓުން އަމުރު ނެރުނީ މިދިޔަ މާރިޗް މަހުގެ 20ވަނަ ދުވަހުގައެވެ. އެ މައްސަލަ ހައި ކޯޓަށް ދައުލަތުގެ ފަރާތުން ހުށަހެޅުމުން، އެ ކޯޓުން ވަނީ މައްސަލަ ބޭރުކޮށްލައިފައެވެ. ހައި ކޯޓުން ބުނީ، އެ މައްސަލަ ބޭރުކޮށްލީ އިސްތިއުނާފުގެ މުއްދަތު ހަމަވިފަހުން ހުށަހެޅުމުން ކަމަށެވެ.
ހައިކޯޓުން ބުނި ގޮތުގައި ބަންދުގެ މައްސަލަ ނިންމާތާ 48 ގަޑިއިރުގެ ތެރޭގައި އެ މައްސަލަ އިސްތިއުނާފަށް ހުށަހަޅަން ޖެހެއެވެ. އަދި އިސްތިއުނާފު މުއްދަތު ގުނާނީ ދަށު ކޯޓުން ނިންމުން ނިންމި ދުވަސް ނުލައި ކަމުގައި ވެސް ހައިކޯޓުން ބުނެފައިވެއެވެ.
ހައި ކޯޓުގެ ނިންމުން ދައުލަތުން ސުޕްރީމް ކޯޓުގައި އިސްތިއުނާފު ކުރުމުން އެ ކޯޓުގައި މައްސަލަ ބެއްލެވި ތިން ފަނޑިޔާރުންގެ އިއްތިފާގުން މިއަދު ހުކުމް ކުރީ ހައި ކޯޓުގެ ނިންމުން ގޯސް ކަމަށެވެ. އެހެންވެ، އަހުމަދު މޫސާ (އަންމަޓީ)ގެ މައްސަލަ ބަލައިގަނެ ހައި ކޯޓުގައި ކުރިއަށްގެންދަން އަންގައި ހުކުމްކުރިއެވެ.
Ads by STO
