ރައީސް ނަޝީދަށް ދިން ބޮމުގެ ހަމަލާގައި ފަހުން ހެކި ލިބޭ މީހުންނަށް ދައުވާ ކުރާނެ: ޕީޖީ

ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދަށް އަމާޒުކޮށް ދިން ބޮމުގެ ހަމަލައިގައި އިތުރު ހެކި ލިބޭ މީހުންގެ މައްޗަަށް ލިބޭ ހެކިތަކެއްގެ މައްޗަށް ބަލައި، ދައުވާ ކުރުމާ މެދު ގޮތް ނިންމާނެ ކަމަށް ޕްރޮސެކިއުޓާ ޖެނެރަލްގެ އޮފީހުން ބުނެފިއެވެ.
ޕީޖީ އޮފީހުން މިއަދު ނެރުނު ބަޔާނެއްގައި ބުނެފައި ވަނީ 6 މެއި 2022 ދުވަހު، ރައީސް ނަޝީދަށް އަމާޒުކޮށް ދިން ނުރައްކާތެރި ޙަމަލާގެ މައްސަލައިގެ ތަޙްޤީޤާއި ދައުވާ ކުރުމުގެ ކަންތައް ހިނގަމުން ދިޔައީ އެކަމަށް ޤާނޫނުތަކުގައި ކަނޑައެޅިފައިވާ މުއްދަތުތަކުގެ ތެރޭގައި ޤާނޫނުގައި ކަނޑައަޅައިފައި އޮތް އުޞޫލުތަކުގެ ތެރެއިން ކަމަށެވެ.
އަދި ހެކި ހޯދުމާއި ހެކި ވަޒަންކުރުމާއި ކޯޓަށް ދައުވާ ހުށަހަޅަން ތައްޔާރުކުރުމާއި އެ ހުރިހައި ކަމެއް ހިނގައިދިޔައީ ފުލުހުންގެ ތަޙްޤީޤު ޓީމުތަކާއި ޕްރޮސިކިއުޓަރުންގެ ޓީމާ އެއްކޮށް މަސައްކަތް
ކޮށްގެން ކަމަށާއި މިމައްސަލައަށް ޚާއްޞަ ކޮށްފައިވާ ޕްރޮސިކިއުޓަރުންގެ ތެރެއިން 2 މީހަކު ހުރިހައި ވަގުތެއްގައި ފުލުހުންނާ އެއްކޮށް މަސައްކަތް ކޮށްފައިވާ ކަމަށެވެ.
އޭގެ ފަހުން އެ މައްސަލަ ދިރާސާ ކުރުމުގެ މަރްޙަލާގައި މައްސަލައަށް ބޭނުންވާ ވަރަށް ރާއްޖެއިންނާއި ރާއްޖެއިން ބޭރުން ލިބެން ހުރި ވަޞީލަތްތައް ފުރިހަމައަށް ބޭނުންކޮށްފައިވާނެ ކަމަށާއި ޔުނައިޓެޑް ސްޓޭޓްސް އޮފް އެމެރިކާއާއި، އިނގިރޭސި ވިލާތާއި، އޮސްޓްރޭލިޔާއާއި، އެހެނިހެން ޤައުމުތަކުގެ ފަންނީ އެހީތެރިކަން މި މަސައްކަތަށް އަބަދުވެސް ލިބެމުންދާ ކަމަށް އެ ބަޔާނުގައި ބުނެފައިވެއެވެ.
އަދި މިޙަމަލާ ދިނުމުގައި އިސްކޮށް ޙަރަކާތްތެރިވި މީހަކު، ތަޙްޤީޤާއި ޝަރީޢަތުގެ މަޖިލީހުގައި އިޢުތިރާފު ވެފައިވެފައިވާ ކަމަށާއި އޭނާގެ މައްޗަށް ހުކުމްކޮށް، އެޙުކުމް މިހާރު އެގެންދަނީ ތަންފީޒުކުރަމުން ކަމަށް ވެސް އެ ބަޔާނުގައި ބުނެފައި ވެއެވެ. އަދި އޭނާގެ އިޢުތިރާފާއި ހެކިތަކުން ފެންނަން ހުރި ކަންކަމާ ދިމާވާ ކަމަށާއި އިޢުތިރާފަކީ އެއްވެސް މަޖުބޫރުކަމެއް ނެތި ވެފައިވާ އިޢުތިރާފެއްކަން، ފުލުހުންނާ ވަކިން، ޕްރޮސިކިއުޓަރ ޖެނެރަލް ކަށަވަރު ކޮށްދީފައިވާ ކަމަށެވެ.






ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.