2023ގެއްލުވައިލައިގެން 2028 ލިބޭނެކަމަށް ހީކުރުމަކީ ކުށްހީއެއް: ޣަފޫރު
ކުރިޔަށް އޮތް 2023ވަނަ އަހަރު އޮންނަ ރިޔާސީ އިންތިހާބު އެމްޑީޕީއަށް ގެއްލުވައިލައިގެން، 2028ގައި އޮންނަ ރިޔާސީ އިންތިހާބު ކާމިޔާބު ކުރެވޭނެކަމަށް ހީކުރުމަކީ ކުށްހީއެއްކަމަށް ރައްޔިތުންގެ މަޖިލީހުގެ ހަނިމާދޫ ދާއިރާގެ މެންބަރު ޢަބްދުލް ޣަފޫރު މޫސާ ވިދާޅުވެއްޖެއެވެ.
ޓީވީ ޕްރޮގްރާމަކަށް ދެއްވި އިންޓަވިއުއެއްގައި ޣަފޫރު ވިދާޅުވީ 2023 ގެއްލުވައިލާން މަސައްކަތް ކުރަނީ ސަރުކާރުން ކަމަށް ބައެއް ފަރާތްތަކުން ބުނަމުން ދިޔަ ނަމަވެސް އެއީ ހަގީގަތާ ހިލާފު ވާހަކައެއް ކަމަށެވެ. އަދި އެމްޑީޕީއަށް 2023 ކާމިޔާބު ކުރެވެން އޮތް ހަމައެކަނި މަގަކީ އެމްޑީޕީގެ ޗެއާޕާސަން އިންތިހާބުގައި ވާދަކުރައްވާ އިކޮނޮމިކް މިނިސްޓަރު ފައްޔާޒު އިސްމާއިލް ހޮވުންކަމަށް ޣަފޫރު ވިދާޅުވިއެވެ.
"2023 ގެއްލުވާލަން މަސައްކަތް ކުރަނީ ސަރުކާރުން ކަމަށް ބައެއް ފަރާތްތަކުން ބުނަމުން އެބަދޭ. އެހެން ނަމަވެސް އެއީ ހަގީގަތާ ހިލާފު ވާހަކައެއް. އެމްޑީޕީއަށް 2023 ކާމިޔާބު ކުރެވެން އޮތް މަގަކީ ޗެއަރޕާސަންކަމަށް ފައްޔާޒު އިސްމާޢީލް ހޮވުން" ޣަފޫރު ވިދާޅުވިއެވެ.
އެމްޑީޕީގެ ޗެއަރޕާސަންގެ އިންތިޚާބުގެ ފޯރި ވަރަށް ބޮޑަށް ވަނީ ގަދަވެފައެވެ. އެއާ އެކު ފައްޔާޒާއި އިންތިގެ ޓީމުން ދަނީ ބަހުގެ ހަމަލާތައް ބަދަލުކުރަމުންނެވެ. މި އިންތިހާބާ ގުޅިގެން އެމްޑީޕީ ވަރަށް ބޮޑަށް ދެބައިވެފައިވާއިރު ސަރުކާރަށް ތާއީދުކުރާ މެންބަރުންނާއި ރައީސް ނަޝީދަށް ތާއީދު ކުރާ މެންބަރުންގެ މެދުގައި ވަނީ ދެ ފެކްޝަން އުފެދިފައެވެ.
