ރޮޒައިނާގެ ސުވާލެއް:އިންތި ކެންޕެއިން ދަތުރުތަކަށް ޚަރަދު ކުރެއްވީ ބޮލި ހިލައިގެންތޯ؟
އެމްޑީޕީގެ ޗެއާޕާސަންކަމަށް އިކޮނޮމިކް މިނިސްޓަރ ފައްޔާޒް އިސްމާޢީލާ ވާދަކުރައްވާ ރައްޔިތުންގެ މަޖިލީހުގެ މާފަންނު އުތުރު ދާއިރާގެ މެންބަރު އިމްތިޔާޒް ފަހްމީ (އިންތި)ގެ ޓީމުން ކެންޕެއިން ދަތުރުތަކަށް ޚަރަދު ކުރެއްވީ ބޮލި ހިލައިގެންތޯ ސުވާލުކުރަން ރައްޓެހިން އެދޭ ކަމަށް، އައްޑޫ މީދޫ ދާއިރާގެ މެންބަރު ރޮޒައިނާ އާދަމް ވިދާޅުވެއްޖެއެވެ.
ރޮޒައިނާ މިހެން ވިދާޅުވެފައި ވަނީ، މާލޭ ސިޓީގެ މޭޔަރު ޝިފާ މިއަދު ކުރެއްވި ޓްވީޓަކަށް ރައްދު ދެއްވަމުންނެވެ.
"އެއްބައެއްގެ އަތުގައި ވަރަށް ފައިސާ ގިނައެވެ، ގިއްކިޔައިފައި ޖަލްސާތައް ބާއްވާ ކެންޕެއިން ހިންގިޔަސް ވިޔަފާރިޔާއަށް ވެސް އާއްމު މީހާއަށް ވެސް އަދި އަރައިނުގަނެވޭ" ފައްޔާޒްގެ ކެންޕެއިން ޓީމުން، ސަރުކާރުން ޚަރަދު ކުރައްވާ ކަމަށް ތުހުމަތު ކުރައްވަމުން ޝިފާ ވިދާޅުވިއެވެ.
މި ޓްވީޓަށް ރައްދު ދެއްވަމުން ރޮޒައިނާ ވިދާޅުވީ، ޝިފާ ކުރައްވާ ކަމަކީ ޕާޓީ ތެރޭ ފިތުނަ އުފެއްދުން ކަމަށެވެ. އަދި އެމްޑީޕީ މެންބަރަކަށްވެ ހުރެ، ސަރުކާރަށް ނަފުރަތުކުރުން ހުތުރު ކަމަށް ވިދާޅުވިއެވެ.
"އިންތި ކެންޕެއިން ދަތުރުތަކަށް ޚަރަދު ކުރެއްވީ ބޮލި ހިލައިގެންތޯ، ޝިފާ ގާތު އަހާލުމަށް އަޅުގަނޑުގެ ރައްޓެހިން އެބަ އެދޭ. ޝިފާ ތާއަބަދު ޕާޓީ ތެރޭ ފިތުނަ އުފައްދާ ސަރުކާރަށް ނަފްރަތު އުފެއްދުމަށް ތި ކުރައްވާ މަސައްކަތް އެމްޑީޕީގައި ހުންނަވައިގެން ކުރެއްވީމާ ވަރަށް ހުތުރު" ރޮޒައިނާ ވިދާޅުވިއެވެ.
