ޔޫއޭއީގެ ރައީސް އަވަހާރަވުމުން ދިވެހި ދިދަ ތިން ދުވަހަށް ބައިދަނޑިއަށް
ޔުނައިޓެޑް އެރެބް އެމިރޭޓްސްގެ ރައީސް އައްޝައިޚު ޚަލީފާ ބިން ޒާއިދު އާލް ނަހްޔާން އަވަހާރަވުމުން އެކަމުގެ ހިތާމައިގައި ތިން ދުވަސް ވަންދެން ދިވެހި ދިދަ ބައިދަނޑިއަށް ތިރިކުރެއްވުމަށް ރައީސުލްޖުމްހޫރިއްޔާ، އިބްރާހީމް މުޙައްމަދު ޞާލިޙް ނިންމަވައިފިއެވެ.
ރައީސް އައްޝައިޚު ޚަލީފާ ބިން ޒާއިދު އާލް ނަހްޔާން އަވަހާރަވުމުގެ ހިތާމައިގައި ޤައުމީ ދިދަ ބައިދަނޑިއަށް ތިރިކުރެއްވުމަށް ނިންމަވައިފައި ވަނީ 2022 މޭ 14 ވާ ހޮނިހިރު ދުވަހުން ފެށިގެން 2020 މޭ 16 ވާ ހޯމަދުވަހުގެ ނިޔަލަށެވެ. ޔޫ.އޭ.އީގެ ރައީސް އަވަހާރަވީ މިއަދު މެންދުފަހުގެ ވަގުތެއްގައެވެ. އަވަހާރަވިއިރު އުމުރު ފުޅަކީ 73 އަހަރެވެ.
ޔޫއޭއީގެ ރަސްމީ އިދާރާތަކުން ހާމަކުރައްވައިފައިވާ ގޮތުގައި ރައީސް ޒައިދު އަލްނަހްޔާން އަވަހާރަވީ ވަރަށް ގިނަ ދުވަހު އާލާސްކަންފުޅާ އުޅުއްވުމަށް ފަހު މިއަދުގެ ވަގުތެއްގައެވެ. އަވަހާރަވި އިރު އުމުރުފުޅުން 73 އަހަރެވެ.
ޝައިޚް ޒައިދަށް މީގެ އަށެއްކަ އަހަރު ކުރީން ވަނީ ސްޓްރޯކެއް ޖެހިވަޑައިގެންފައެވެ. އެ އާލާސްކަންފުޅު ދިގު މުއްދަތަކަށް ދެމިގެން ދިޔައެވެ.
ޝައިޚް ޒައިދު ވަނީ 2004ވަނަ އަހަރުގެ ނޮވެމްބަރު މަހުގެ 3 ވަނަ ދުވަހުން ފެށިގެން ޔޫއޭއީގެ ރައީސް އަދި އަބޫދާބީގެ ވެރިޔާގެ މަގާމު އަދާކުރައްވައިފައެވެ.
1948ވަނަ އަހަރު އުފަންވި ޝައިޚް ޚަލީފާއަކީ ޔޫއޭއީގެ ދެވަނަ ރައީސް އަދި އަބޫދާބީގެ އަމީރޭޓްގެ 16 ވަނަ ވެރިޔާއެވެ. 1971ވަނަ އަހަރު ޔުނައިޓެޑް އަރަބް އެމިރޭޓްގެ ޔޫނިއަން އުފެދުނު ފަހުން 2004ވަނަ އަހަރާ ހަމައަށް އެ ޤައުމުގައި ވެރިކަން ކުރަމުން ދިޔައީ، ޝެއިޚް ޒައިދުގެ ބައްޕާފުޅެވެ.
އެ މަނިކުފާނުގެ ވެރިކަމުގައި ޔޫއޭއީއަށް ވަނީ އެ ޤައުމުގެ ރައްޔިތުންނަށް ފުދޭ ދިރިއުޅުމެއް ކަށަވަރުކޮށްދޭ، ހަލުވި ތަރައްގީއެއް ގެންނަވައިފައެވެ.
