ރައީސް ޞާލިޙްގެ އެހީތެރިކަމާ އެކު ނިއުރޭޑިއަންޓް އަނބުރާ ކޮޅަށް ޖަހަނީ!
މުސާރައިގެ މައްސަލައިގައި ފުޓުބޯޅައިގެ ހުރިހާ ހަރަކާތަކުން ސަސްޕެންޑުކޮށްފައިވާ ދިވެހިރާއްޖޭގެ ފުޓުބޯޅައިގެ އެންމެ ކާމިޔާބު އެއް ކުލަބު، ނިއުރޭޑިއަންޓް ސްޕޯޓްސް ކުލަބު އަނބުރާ ކޮޅަށް ނެގުމުގެ މަސައްކަތް ފަށައިފިއެވެ.
ނިއު އަލުން ކޮޅަށް ނެގުމުގެ މަސައްކަތް ކުރިއަށް ގެންދިއުމަށް، އެ ޓީމުގެ އައު ބޯޑެއް ރޭ ވަނީ އިންތިހާބުކޮށްފައެވެ. ރޭ ޝީ ބިލްޑިންގގެ ހޯލުގައި ކުރިއަށް ދިޔަ އިންތިޚާބުގައި ބައިވެރިވި އެންމެންގެ އިއްތިފާޤުން ޗެއާމަނަކަށް އިންތިޚާބުވެފައި ވަނީ އަޙްމަދު ވާޞިފެވެ.
ވާޞިފަކީ ނިއުރޭޑިއަންޓުގެ އެންމެ ފަހު ބޯޑުގެ މެމްބަރެއްގެ އިތުރުން ނިއުރޭޑިއަންޓުގެ ސަޕޯޓަރުން އިސްނަގައިގެން ހަދެމަށް މަސައްކަތް ކުރި، ރޭޑިއަންޓް ސްޕޯޓްސް ކުލަބުގެ ޗެއާމަންކަމަށް ވެސް ހަވާލުވެލެއްވި ބޭފުޅާއެވެ.
ވާޞިފްއާ އެކު އައު ބޯޑުގެ ވައިސް ޗެއާމަނުންނަށް އިންތިހާބުވީ ޒަހީނުއްދީން ސަޢީދު އަދި އިސްމާޢިލް ރަޝީދެވެ. ސެކްރެޓަރީގެ މަޤާމަށް ސާއިދު އަލީ ދީދީ އިންތިޚާބުވި އިރު، ޚާޒާންދާރަކަށް އިންތިހާބުވީ އަޙްމަދު ހުސައިންއެވެ. މީގެ އިތުރުން ބޯޑުގެ އިތުރު ހަތަރު މެމްބަރުންނަށް އިންތިހާބުވީ، މުހައްމަދު ޔޫސުފް، ލުއައްޔު އާދަމް، އާސިމް ރިޒާ އަދި މުހައްމަދު މާލިކެވެ.
ރޭގެ އިންތިޚާބަށް ފަހު ކުލަބުގެ ސަޕޯޓަރުންނާއި ވާހަކަދައްކަވަމުން ވާޞިފް ވިދާޅުވީ، ނިއުރޭޑިއަންޓު އަނބުރާ ކޮޅަށް ޖެހުމުގެ މަސައްކަތް ކުރިއަށް ދަނީ ރައީސް އިބްރާޙިމް މުޙައްމަދު ޞާލިހުގެ މޭސްތިރިކަމުގެ ދަށުން، ރައީސް އޮފީހުގެ މިނިސްޓަރު އަޙްމަދު ސަމީރުގެ އިރުޝާދާ ލަފާގެ މަތިން ކަމަށެވެ. އަދި މި އަހަރު ނިއުރޭޑިއަންޓު އަނބުރާ ފުޓުބޯޅައިގެ ތެރެއަށް ގެނެވޭނެކަމުގެ އުއްމީދު އެބައޮތްކަމަށް ވާޞިފް ވިދާޅުވިއެވެ.
ނިއުރޭޑިއަންޓުގެ ދަރަނި މިހާރު 5 މިލިއަނަށް ވުރެ މަތިވެފައިވާއިރު، އަނބުރާ އާދެވެން އޮތީ މި ދަރަނި އަދާކޮށްގެންނެވެ.
