ހައިކޯޓުގެ ދެ ގޮފި އުވައިލުން ކުށްވެރިކުރަން: ރުކުމާ
ހައިކޯޓުގެ އުތުރު ގޮތްޕާއި ދެކުނު ގޮފި އުވައިލުމުން ރައްޔިތުން މަޖިލީހުގެ ހެންވޭރު ދެކުނު ދާއިރާގެ ކުރީގެ މެންބަރު އަދި ޕީޕީއެމްގެ ސެނެޓާ މުޙައްމަދު ޢަބްދުލްކަރީމް (ރުކުމާ) ކަންބޮޑުވުން ފާޅުކުރައްވައިފިއެވެ.
ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް މިއަދު ވަނީ ދިވެހިރާއްޖޭގެ ކޯޓުތަކުގެ ޤާނޫނަށް ހަތަރުވަނަ އިސްލާހު ގެނައުމުގެ ބިލު ތަސްދީޤު ކުރައްވައިފައެވެ.
މި ޤާނޫނަށް ގެނައި މައިގަނޑު އިސްލާހުތަކުގެ ތެރޭގައި ހދ.ކުޅުދުށްފުށީގައި ހުންނަ ހައިކޯޓުގެ އުތުރު ގޮތްޕާއި އައްޑޫގައި ހުންނަ ދެކުނު ގޮފި އުވައިލުން ހިމެނެއެވެ.
އިސްލާހުގައިވާ ގޮތުން އެ ޤާނޫނަށް އަމަލުކުރާނީ ޤާނޫނު ފާސްވެ, ތަސްދީޤުކުރައްވައި ސަރުކާރުގެ ގެޒެޓްގައި ޝާއިއުކުރާ ހިސާބުންނެވެ. އެހެންކަމުން މިއަދުން ފަށައިގެން ހައިކޯޓުގެ ދެ ގޮފި އުވިގެންދިޔައީއެވެ.
އެ ގޮތުން ރުކުމާ މިއަދު ވިދާޅުވީ ހައިކޯޓުގެ އުތުރު ގޮތްޕާއި ދެކުނު ގޮފި އުވާލުން ކުށްވެރި ކުރައްވާ ކަމަށެވެ.
ރުކުމާ ވިދާޅުވީ ލާމަރުކަޒު ވާންޖެހޭނީ ހަމައެކަނި އިދާރީ ހިންގުމެއް ނޫން ކަމަށެވެ. އަދި އިންސާފު ގާއިމު ކުރުން ވެސް ލާމަރުކަޒު ވާންޖެހޭކަމަށް އޭނާ ވިދާޅުވިއެވެ.
