އަލަމްގިރި ގާތަށް ދިޔަ މީހުންގެ ކޮންޓެކްޓް ޓްރޭސިންގ ހަދަންޖެހޭ: ޝިޔާމް

އެއް ޖިންސުން ގުޅުން ހިންގި ބަންގްލަދޭޝްގެ އެމްޑީ އަލަމްގިރި ގާތަށް ދިޔަ މީހުންގެ ކޮންޓެކްޓް ޓްރޭސިންގ ހަދަންޖެހޭކަމަށް ޕީޕީއެމްގެ ނައިބު ރައީސް އަދި ރައްޔިތުންގެ މަޖިލީހުގެ ނައިފަރު ދާއިރާގެ މެންބަރު އަޙްމަދު ޝިޔާމް ވިދާޅުވެއްޖެއެވެ.

Ads by STELCO

''މަންކީ ޕޮކްސް'' ނަމަކަށް ކިޔާ ބައްޔާ ގުޅިގެން ޑަބްލިޔުއެޗްއޯއިން މުޅި ދުނިޔޭގައި އިމަޖެންސީ އިއުލާނުކުރި ޚަބަރާ ގުޅިގެން ޝިޔާމް ކުރެއްވި ޓުވީޓެއްގައި ވިދާޅުވީ, ޑަބްލިޔުއެޗްއޯގެ މި ކަންބޮޑުވުމާއެކީ މިހާރުން މިހާރަށް ދެކަމެއް ކުރަންޖެހޭ ކަމަށެވެ.

ފުރަތަމަ ކަމެއްގެ ގޮތުގައި ޝިޔާމް ވިދާޅުވީ ހެލްތު ޕްރޮޓެކްޝަން އެޖެންސީން އެކްޓިވޭޓުވެ, އަލަމްގިރިއަށް ޒިޔާރަތްކުރި ފަރާތްތަކުގެ ޓުރޭސިން ހަދަންޖެހޭ ކަމަށެވެ. އަދި ދެވަނަ ކަމަކީ ފުލުހުން އެ އެންމެން ހިފައި ހައްޔަރުކޮށް ތަޙުޤީގު ހިންގާ ޙައްޤު އަދަބުދިނުންކަމަށް ޝިޔާމް ވިދާޅުވިއެވެ.

މިހާތަނަށް ދުނޔޭގެ 75 ޤައުމަކުން މަންކީ ޕޮކްސްގެ 17000 އަށްވުރެ ގިނަ ކޭސްވަނީ ފެނިފައިވާކަމަށް ރިޕޯޓުތައް ބުނާއިރު, މަންކީ ޕޮކްސް އެންމެ ބޮޑަށް ޖެހެނީ އެއް ޖިންސުން ގުޅުން ހިންގާ މީހުންގެ ފަރާތުންނެވެ. ރިޕޯޓުތަކުން ދައްކާ ގޮތުގައި މަންކީ ޕޮކްސް ޖެހިފައިވާ %98 މީހުންނަކީ އެ ގުރޫޕަށް ނިސްބަތްވާ މީހުންނެވެ.

ބަންގްލަދޭޝްގެ އަލަމްގިރިއާއެކު އެއް ޖިންސުން ގުޅުން ހިންގި ދިވެހިންގެ ޢަދަދު 250 އަށް އަރާކަމަށް ރިޕޯޓުތައް ބުނެއެވެ. ނަމަވެސް ރަސްމީ އިދާރާއަކުން އެކަން އަދި ކަށަވަރުކޮށްދީފައެއް ނުވަތަ މި މައްސަލައާ ގުޅިގެން މިހާތަނަށް އެއްވެސް އެއްޗެއް ބުނެފައެއް ނުވެއެވެ. މިހާތަނަށް ކުރި ކަމަކީ އަލަމްގިރި ހައްޔަރު ކުރުމެވެ. އެކަމަކު އަލަމްގިރިއާއެކު ފާހިޝް ޢަމަލު ހިންގި ހައިޕްރޮފައިލް ބޭފުޅުންނަށް އަދި ފިޔަވަޅެއް އަޅާފައެއް ނުވެއެވެ.