ރާއްޖޭގައި ބައިނަލްއަޤްވާމީ ފެންވަރަށް ފަތުރުވެރިކަމުގެ ތަމްރީނުދޭ މަރުކަޒެއް ގާއިމުކުރެވޭނެ: މައުސޫމް
ކުރިއަށް އޮތް ތަނުގައި ރާއްޖޭގައި ބައިނަލްއަޤްވާމީ ފެންވަރަށް ފަތުރުވެރިކަމުގެ ތަމްރީނުދޭ މަރުކަޒެއް ގާއިމުކުރެވޭނެކަމަށް ޓޫރިޒަމް މިނިސްޓަރު ޑރ.ޢަބްދުﷲ މަޢުޞޫމް ވިދާޅުވެއްޖެއެވެ.
ރާއްޖެ ޓީވީގެ ޕްރޮގްރާމެއްގައި ރޭ ވާހަކަދައްކަވަމުން މިނިސްޓަރު ވިދާޅުވީ ރާއްޖޭގައި ބައިނަލްއަޤްވާމީ ފެންވަރަށް ތަމްރީނުދޭ މަރުކަޒެއް ގާއިމުކުރުމަކީ ރައީސް އިބްރާހިމް މުޙައްމަދު ޞާލިޙްގެ އަމާޒެއް ކަމަށާއި އެ އަމާޒަށް އަދި ވާސިލުވެވޭނެ ކަމަށެވެ.
މިނިސްޓަރު ވިދާޅުވީ ރާއްޖެއަކީ ފަތުރުވެރިކަމުގެ އެއްވަނަ މަންޒިލުކަން ފާހަގަކުރައްވައި މިނިސްޓަރު އިތުރަށް ވިދާޅުވީ މިއީ ފަތުރުވެރިކަން ކިޔަވަން ރާއްޖެ އަންނަންވީ ޒަމާން ކަމަށެވެ. އަދި ހަމައެހެންމެ މި ދާއިރާގައި ރާއްޖެއާ ވާދަކުރެވޭވަރުގެ ފެސިލިޓީ އެހެނިހެން ޤައުމުތަކުގައި ނެތްކަމަށް ވެސް މިނިސްޓަރު ވިދާޅުވިއެވެ.
މީގެ އިތުރުން މިނިސްޓަރު ވަނީ ފަތުރުވެރިކަމުގެ ދާއިރާގައި ދިވެހިން މެހެމާންދާރީ އަދާކުރާ ގޮތަކީ ފާހަގަކޮށްލެވޭ ޚާއްސަ ސިފައެއްކަމަށް ވެސް ވިދާޅުވެފައެވެ. މިނިސްޓަރު ވިދާޅުވީ މެހެމާންދާރީއަކީ ދިވެހިންގެ ތަބީޢީ ސިފައެއް ކަމަށާއި އެކަމާ ވާދަކުރެވޭނެ އެހެން ބަޔަކު ނެތް ކަމަށެވެ.
