އަލަމްގިރި ގާތަށް ''ބިޒްނަސް މީޓިންގ'' އަށް ދިޔަ ނަޝީދުގެ ބަންދަށް 07 ދުވަސް
އެއްޖިންސުން ޖިންސީ ގުޅުން ހިންގުން ނުވަތަ ލިވާތުކުރި މައްސަލައިގައި ހައްޔަރުކުރި ރައްޔިތުން މަޖިލީހުގެ ކުރީގެ މެންބަރު ކާނަލް މުޙައްމަދު ނަޝީދުގެ ބަންދަށް 07 ދުވަސް ޖަހައިފިއެވެ.
ބަންގުލަދޭޝްގެ އެމްޑީ އަލަމްގިރިއާއެކު އެއް ޖިންސުން ގުޅުން ހިންގިކަމަށް ތުހުމަތުކުރެވޭ މައްސަލައިގައި ނަޝީދު ހައްޔަރުކުރީ އިއްޔެގައެވެ.
ފުލުހުން ބުނީ އެ މައްސަލައިގެ ތުހުމަތުގައި ހައްޔަރުކުރި 45 އަހަރުގެ ފިރިހެން މީހާގެ ބަންދަށް 07 ދުވަސް ޖަހާފައިވާ ކަމަށެވެ.
ކާނަލް ނަޝީދު ހައްޔަރުކޮށް ބަންދުގެ މުއްދަތު ޖަހާފައިވާއިރު އޭނާކަމަށް ބެލެވޭ މީހަކު އަލަމްގިރިއާއެކު އެއް ޖިންސުން ގުޅުން ހިންގާ މަންޒަރު ފެންނަ ވީޑިއޯއެއް ވަނީ ޢާންމުވެފައެވެ. ވީޑިއޯތައް ޢާންމުވީ ބައިބަޔަށެވެ. ފުރަތަމަ ވީޑިއޯ ޢާންމުވުމާއެކު ނަޝީދު ވިދާޅުވީ އަލަމްގިރި އުޅޭ ކޮޓަރިއަށް ދިޔައީ ބިޒްނަސް މީޓިންގއަކަށް ކަމަށެވެ.
އަލަމްގިރިއާއެކު އެއް ޖިންސުން ގުޅުން ހިންގިކަމަށް ތުހުމަތުކުރެވޭ މައްސަލައިގައި އިއްޔެ ހައްޔަރުކުރި ނާޒިމް ޢަބްދުއްސައްތާރުގެ ބަންދަށް ވެސް ވަނީ 07 ދުވަސް ޖަހާފައެވެ.
