ލާމަރުކަޒު ކުރުމުގެ ބޭނުމަކީ އެރަށެއްގެ މުއްސަދިކަން އެރަށަކަށް ހޯދައިދިނުން: ނިޔާޒް

(ލ. ފޮނަދޫ) ލާމަރުކަޒު ކުރުމުގެ ބޭނުމަކީ އެރަށެއްގެ މުއްސަދިކަން އެރަށަކަށް ހޯދައިދިނުން ކަމަށް ރައްޔިތުންގެ މަޖިލީހުގެ ހުޅުމާލޭ ދާއިރާގެ ރައްޔިތުންގެ މަޖިލީހުގެ މެންބަރު ޢަލީ ނިޔާޒު ވިދާޅުވިއެވެ.

Ads by MWSC

"ސަރުކާރުން އޭރު މަޝްވަރާ ކުރަން ތިބި ހުރިހާ ކަމެއް ކުރިން، ސަރުކާރުގެ ފަރާތުން 22 އިސްލާޙެއް ހުށަހެޅި، ނަމަވެސް އަޅުގަނޑުމެން އެއަށްވުރެ ފުޅާކޮށް މަޝްވަރާއަށްފަހު 80 އަށްވުރެ ގިނަ އިސްލާހް ގެނައިން." ނިޔާޒް ވިދާޅުވިއެވެ.

ނިޔާޒް ވިދާޅުވީ ލާމަރުކަޒު ކުރުމަށް ސަރުކާރުން ގެންގުޅެމުން އަންނަ ސިޔާސަތުގެ މައިގަނޑު ބޭނުމަކީ އެރަށެއްގެ މުއްސަދިކަން އެރަށަކަށް ހޯދައިދިނުން ކަމަށާއި މިއަދު ކުރަމުން މިދާ މަސައްކަތަކީ އެކަމަށް ހުރި ގޮންޖެހުންތައް ދެނެގަތުން ކަމަށެވެ.

"ޤަރާރުގައި އަޅުގަނޑު ބުނެފައިވާނެ، މި ޤަރާރުގެ ބޭނުމަކަށް ވަނީ އެ ރަށެއްގެ މުއްސަދިކަން އެރަށަކަށް ހޯދައިދިނުމޭ. އެއީ އެ ޤަރާރުގެ ސުރުޚީއަކީ ވެސް. އަޅުގަނޑުމެން މިތަަނަށް އެއްވެ މިތިބީ އެ ޤާނޫނުގެ ދަށުން އިސްލާޙްވުމަށްފަހު ފުރަތަމަ އިންތިޚާބުވި ކައުންސިލަރުންނާއެކު މިއަދު އެއްވެ މިތިބީ، އެ އިސްލާޙްތަކަށް ހުރި ގޮންޖެހުންތަކަކީ ކޮބައިތޯ ބެލުމަށް" ހަތް އަތޮޅެއްގެ ކައުންސިލަރުންނާއި އަންހެނުންގެ ކޮމިޓީތަކުގެ މެންބަރުން ބައިވެރިވި މި މަހާސިންތާގައި ވާހަކަފުޅު ދައްކަވަމުން ނިޔާޒް ވިދާޅުވިއެވެ.

ފަނޯއްލަ ދަރުބާރަކީ ސަރުކާރުގެ 5 އަހަރުގެ ސްޓްރެޓީޖިކް އެކްޝަން ޕްލޭން (ސެޕް) ގެ ސިޔާސަތުތަކާއި ލާމަރުކަޒީ ޤާނޫނަށް ގެނެވުނު 8 ވަނަ އިސްލާހު ތަންފީޛުކުރުމަށް ހުރި ގޮންޖެހުންތައް ދެނެގަނެ، ޖުމްލަގޮތެއްގައި ލާމަރުކަޒީ ނިޒާމު ހިންގުމަށް ހުރި ދަތިތައް ފާހަގަކޮށް އެކަންކަމާ ގުޅޭގޮތުން މަޝްވަރާކޮށް، އެކަންކަން ހައްލުކުރުމަށް ކަމާގުޅޭ ފަރާތްތަކަށް ހުށަހެޅުމުގެ މަގްސަދުގައި ކުރިއަށް ގެންދާ ޕްރޮގްރާމެކެވެ.

ނިޔާޒް ވިދާޅުވީ، މިހާރު ވެސް މަޝްވަރާ ކުރެވިގެން ޤާނޫނަށް ގެންނަން ޖެހޭ ބަދަލުތަކެއް ހުރިނަމަ، އެކަން ކުރުމަށް ސަރުކާރުން އޮތީ ތައްޔާރަށް ކަމަށެވެ.

އަދި ލާމަރުކަޒީ ގާނޫނަށް އެންމެ އަވަހަށް ގެނައުމަށް މަޝްވަރާ ކުރަމުންދާ ބަދަލާއި ބޭހޭ ގޮތުން ވާހަކަފުޅު ދެއްކެވިއެވެ. އެއީ އަންހެނުންގެ ކޮމިޓީތަކުގެ އިންތިޚާބު އަވަސް އަވަހަށް ބާއްވަން ޖެހޭތީ އެކަމަށް ހައްލު ހޯދުމަށް ހުށަހަޅާފައިވާ ބިލެވެ.

މިދިޔަ މަހުގެ 31 ވަނަ ދުވަހު ލާމަރުކަޒީ ކޮމިޓީއަށް ފޮނުވާފައިވާ އެ ބިލުގައި ވަނީ ޑަބްލިއުޑީސީގެ ބައި-އިލެކްޝަންތައް އަހަރަކު އެއްފަހަރު ބާއްވާގޮތަށް ހަދައި، ކޯރަމް ގެއްލޭ ހާލަތުގައި ދެ މަސް ދުވަސް ތެރޭ އިންތިހާބު ބާއްވާ ގޮތަށް ގާނޫނު އިސްލާހު ކުރުމަށެވެ.