ހަނިމާދޫ އެއާޕޯޓް ތަރައްޤީކުރުމުގެ މަޝްރޫޢުގެ އެއްބަސްވުމުގައި މާދަމާ ރޭ ސޮއިކުރަނީ
ހަނިމާދޫ އިންޓަނޭޝަނަލް އެއާޕޯޓް ތަރައްޤީކުރުމުގެ މަޝްރޫޢުގައި މާދަމާ ރޭ ސޮއިކުރާނެކަމަށް އިކޮނޮމިކް މިނިސްޓްރީން ބުނެފިއެވެ.
އިންޑިއާގެ އެގްޒިމް ބޭންކުން ރާއްޖެއަށް ދީފައިވާ 800 މިލިއަން ޑޮލަރުގެ ކްރެޑިޓް ލައިންގެ ދަށުން ހިންގަން ހަމަޖެހިފައިވާ ހަނިމާދޫ އިންޓަނޭޝަނަލް އެއާޕޯޓް ތަރައްޤީކުރުމުގެ މަޝްރޫޢުގެ އެއްބަސްވުމުގައި ސޮއިކުރުމަށް ހަމަޖެހިފައިވަނީ މާދަމާ ރޭ 21:00 ގައި މީރުމާ އިވެންޓު ހޯލުގައި ބާއްވާ ރަސްމިއްޔާތެއްގައެވެ.
މި މަޝްރޫޢުގެ މަސައްކަތް ހަވާލުކޮށްފައިވަނީ އިންޑިއާގެ ޖޭއެމްސީ ޕްރޮޖެކްޓްސްއާއެވެ. އެއީ 136.6 މިލިއަން ޑޮލަރަށެވެ.
މި މަޝްރޫޢުގެ ދަށުން ހަނިމާދޫ އެއާޕޯޓުގައި 2.46 ކިލޯ މީޓަރުގެ އާ ރަންވޭއަކާއި, އަހަރަކު 1.3 މިލިއަން ފަސިންޖަރުންނަށް ޚިދުމަތްދެވޭ ފެންވަރުގެ ޒަމާނީ އާ ޓާމިނަލެއް ވެސް ހަދާނެއެވެ.
ހަނިމާދޫ އެއާޕޯޓް ތަރައްޤީކުރުމުގެ އަމަލީ މަސައްކަތް ފަށަން ކުރިން ރާވައިފައި އޮތީ މި އަހަރުގެ މެދުތެރޭގައެވެ. އެކަމަކު ޕްރޮޖެކްޓްގެ އަގުބޮޑުވެ, ކްރެޑިޓް ލައިން އިތުރުކުރަން ޖެހުމުން ބަޔަކާ މަޝްރޫޢު ހަވާލު ނުކުރެވި ލަސްވީއެވެ. ދާދިފަހުން ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙް އިންޑިއާއަށް ކުރެއްވި ދަތުރުފުޅުގައި އެ މަޝްރޫޢު ހިމެނޭ ކްރެޑިޓް ލައިނަށް 100 މިލިއަން ޑޮލަރު އިތުރުކޮށްދިނުމަށް އިންޑިއާއިން ވަނީ އެއްބަސްވެފައެވެ. އެގޮތުން އެކަމުގެ އެއްބަސްވުމުގައި ވަނީ ސޮއިކޮށްފައެވެ.
