ކޮވިޑުގެ ވެކްސިން ދިނުން ވަގުތީ ގޮތުން ހުއްޓުވައިދިނުމުގެ އަމުރަކަށް އެދި ކޯޓަށް މައްސަލަ ހުށަހަޅައިފި
ކޮވިޑް ވެކްސިނޭޝަން ޕްރޮގްރާމާ ގުޅޭ ނިންމުންތަކުގެ މައްސަލަ ބަލައި ދިނުމަށާއި, ކޮވިޑުގެ ވެކްސިންތައް ދިނުން ވަގުތީ ގޮތުން ހުއްޓުވައިދިނުމަށް ވަގުތީ އަމުރެއް ނެރެދިނުމަށް އެދި ސިވިލް ކޯޓަށް މައްސަލަ ހުށަހަޅައިފިއެވެ.
ވެކްސިންތަކުގެ ރައްކާތެރިކަމާ ގުޅޭ ގޮތުން ގިނަގުނަ ސުވާލުތަކެއް ކުރާ، އަދި ހަށިގަނޑުގެ މިނިވަންކަމަށް އިޙްތިރާމު ކުރުމަށާއި, ވެކްސިން ޖެހުން މަޖުބޫރުކުރުމާ ދެކޮޅަށް ވަކާލާތުކުރާ ފަރާތެއް ކަމަށްވާ، ޝިފާން އަޙްމަދުގެ ފަރާތުން ސިވިލް ކޯޓަށް އެ މައްސަލަ ހުށަހެޅީ ލޯ އޮފީސް އޮފް ޢަފްރާ އުޘްމާން އިންނެވެ.
އެ އޮފީހުން ނެރެފައިވާ ނޫސްބަޔާނުގައި ބުނެފައިވަނީ 2021 ވަނަ އަހަރުގެ ފެބްރުއަރީ މަހުން ފެށިގެން ރާއްޖޭގައި ދެމުންގެންދާ ކޮވިޑު ވެކްސިން ދިނުމުގައި ޤާނޫނާއި ގަވާއިދާއި ބައިނަލްއަގުވާމީ މިންގަނޑުތަކާ ޚިލާފު އަމަލުތަކެއް ދިވެހި ދައުލަތުން ހިންގާފައިވާތީ ކޮވިޑް ވެކްސިނޭޝަން ޕްރޮގްރާމާ ގުޅޭ ނިންމުންތަކުގެ މައްސަލަ ބަލައި ދިނުމަށް އެދި ޖުޑީޝަލް ރިވިއުގެ ދަޢުވާއެއް ސިވިލް ކޯޓަށް ހުށަހަޅާފައިވާ ކަމަށެވެ. އަދި މި މަހުގެ ދެވަނަ ދުވަހު އެ މައްސަލަ ކޯޓުގައި ރަޖިސްޓްރީކޮށްފައިވާ ކަމަށެވެ.
ކޮވިޑުގެ ތަހްލީލީ ވެކްސިންތަކެއް ރޯލް-އައުޓް ކުރެވުނު ފަހުން އާދަޔާ ޚިލާފަށް ކުއްލި މަރުތައް އިތުރުވެފައިވާތީއާއި, ދުނިޔޭގެ އެކި ކަންކޮޅުތަކުގައި މިފަދަ މައްސަލަތައް އިތުރުުވެފައިވާކަން ފާހަގަކުރެވޭތީ ބައިނަލްއަގުވާމީ ޑޮކްޓަރުންނާއި, ސައިންޓިސްޓުންގެ ޖަމްޢިއްޔާތަކުން ކޮވިޑުގެ ތަހްލީލީ ވެކްސިންތައް ދިނުން ހުއްޓާލުމަށް ގޮވާލައިފައިވާކަން އެ އޮފީހުން ނެރެފައިވާ ނޫސް ބަޔާނުގައި ފާހަގަކޮށްފައި ވެއެވެ. އެ ގޮތުން މި މައްސަލައިގައި ކޯޓުން ވަކި ގޮތެއް ކަނޑައެޅެންދެން ކޮވިޑުގެ ވެކްސިންތައް ދިނުން ވަގުތީ ގޮތުން ހުއްޓުވައިދިނުމަށް ވަގުތީ އަމުރެއް ނެރެދިނުމަށް ވެސް ވަނީ އެދިފައެވެ.
އަދި ރައްޔިތުންގެ ފުރާނަޔާއި ސިއްހަތުގެ ސަލާމަތަށްޓަކައި ކޮވިޑު ވެކްސިންތައް ދިނުން ހުއްޓާލުމަށާއި ހިނގައިދިޔަ ކުއްލި މަރުތަކުގެ މިނިވަން ފުރިހަމަ ތަޙްޤީޤެއް ކުރުމަށް ދައުލަތަށް ވެސް ގޮވައިލާފައެވެ.
ތީ ވަރަށްރަގަޅު ކަމެއް. ތިކަން ހުއްތަން މާލަސްވެއްޖެ.