ރައްޔިތުންނަށް އޮޅުވާލައިގެން އައި ބަޔަކަށް ދެން މިންވަރުކުރައްވާނީ ކޮން ރަޙްމަތެއްތޯ: ރައީސް ޔާމީން
އެމްޑީޕީގެ މި ސަރުކާރުން އައީ ރައްޔިތުންނަށް ދޮގުހަދައި އޮޅުވާލައިގެން ކަމަށާއި, ރައްޔިތުންނަށް އޮޅުވާލައިގެން އައި ބަޔަކަށް މާތް ﷲ ދެން މިންވަރުކުރައްވާނީ ކޮން ރަޙްމަތެއްތޯ
ޕީޕީއެމްގެ ރިޔާސީ ކެންޑިޑޭޓް ރައީސް ޢަބްދުﷲ ޔާމީން ޢަބްދުލްޤައްޔޫމް މިއަދު ސުވާލުކުރައްވައިފިއެވެ.
ހއ.އަތޮޅުގެ ފަސް ރަށަކަށް މިހާރު ކުރައްވަމުން ގެންދަވާ ދަތުރުފުޅުގައި މިއަދު ތުރާކުނަށް ވަޑައިގެން އެ ރަށުގައި ރައްޔިތުންނާ މުޚާތަބު ކުރައްވައި ދެއްކެވި ވާހަކަފުޅުގައި ރައީސް ޔާމީން ވިދާޅުވީ ހަމައެކަނި މި އުޅެނީ ނާޤާބިލުވުމުގެ މައްސަލައެއް ނޫން ކަމަށާއި, އެއްވެސް ކަމެއްގައި މި ސަރުކާރުގެ އިޚްލާސްތެރިކަމެއް ނެތީ ކަމަށެވެ. އަދި ރައްޔިތުން އެދޭ ގޮތަށް ކަންކަން ތަރުތީބުވެގެން ނުދަނީ ވެރިންގެ އިޚްލާސްތެރިކަން ނެތުމުން ކަމަށެވެ.
''ރައްޔިތުންނާ ހަމައަށް ވަޑައިގެން ރައްޔިތުންނަށް ހުވަފެން ދައްކަވާއިރު, ރައްޔިތުން ކައިރީ އެކިއެކި ވާހަކަ ދައްކަވާއިރު, ހެއްދެވުނުހައި ދޮގުތަކެއް ހައްދަވައިގެން ވާހަކަ ދައްކަވަނީ.'' ރައީސް ޔާމީން ވިދާޅުވިއެވެ.
ރައީސް ޔާމީން ވަނީ އެފަދަ ބަޔަކަށް ބަޔަކަށް މާތް ﷲ ދެން މިންވަރުކުރައްވާނީ ކޮން ރަޙްމަތެއްތޯ ވެސް ސުވާލުކުރައްވައިފައެވެ.
