ކޮވިޑް-19 އާއެކު ވެސް މި ސަރުކާރުން ނެގި ލޯނު ކުރީ ސަރުކާރަށްވުރެ މަދު: އަމީރު
ކުރީގެ ރައީސް އަބުދުﷲ ޔާމީން އަބުދުލްގައްޔޫމުގެ ވެރިކަން 2018 ވަނަ އަހަރު ނިމުނު އިރު، އެ ސަރުކާރުން ދަރަނީގެ ގޮތުގައި 39 ބިލިޔަން ރުފިޔާ ނަގާފައި އޮތް ކަމަށް ފިނޭންސް މިނިސްޓަރު އިބްރާހިމް އަމީރު ވިދާޅުވެއްޖެއެވެ.
މިނިސްޓަރު މިހެން ވިދާޅުވީ، ރައްޔިތުންގެ މަޖިލީހުގެ މިއަދުގެ ޖަލްސާގައި މެންބަރަކު ކުރެއްވި ސުވާލަކަށް ދެއްވި ޖަވާބުގައެވެ.
އަމީރު ވިދާޅުވީ، ދައުލަތައް ލިބެމުންދިޔަ އާމްދަނީ ކޮވިޑް-19 ގެ ސަބަބުން ވަރަށް ބޮޑަށް ދަށްވެގެން ދިޔަ ކަމަށާއި، އެހެން ނަމަވެސް ސަރުކާރުން ވިސްނުންތެރި ކަމާއި އެކު އެޅި ފިޔަވަޅު ތަކުގެ ސަބަބުން ރާއްޖޭގެ ކަންކޮޅުތަކުގައި ހިންގަމުން ދިޔަ ތަރައްގީގެ މަޝްރޫއުތައް ހުއްޓުމެއް ނެތި ކުރިއަށް ގެންދިޔަ ކަމަށެވެ. އަދި ސަރުކާރުގެ މުވައްޒަފުންގެ މުސާރަ ކުޑަ ނުކޮށް ދައުލަތް ހިންގަމުން ދިޔައީ، އެ ދަތި އުނދަގޫ ދުވަސަތަކުގެ ތެރޭގައި ކަމަށް މިނިސްޓަރު ވިދާޅުވިއެވެ.
މިނިސްޓަރުގެ ވާހަކަފުޅުގައި އިތުރަށް ވިދާޅުވީ، މިކަންކަން ސަރުކާރުން ކުރީ ދަރަންޏަށް ފައިސާ ނަގައިގެން ކަމަށާއި، އެ ދަރަންޏާއި އެކުވެސް ރައީސް ޔާމީންގެ ވެރިކަމުގައި ނެގި ދަރަންޏަށްވުރެ މި ސަރުކާރުން ނެގި ދަރަނި ކުޑަވާނެ ކަމަށެވެ. އެގޮތުން ރައީސް ޔާމީންގެ ސަރުކާރުން 39 ބިލިއަން ރުފިޔާގެ ދަރަނި ނަގާފައި ވާއިރު، ރައީސް ސޯލިހުގެ ސަރުކާރުން ނަގާފައިވަނީ 37 ބިލިއަން ރުފިޔާގެ ދަރަނި ކަމަށް މިނިސްޓަރު ވިދާޅުވިއެވެ.
މި ސަރުކާރުގެ ދަރަނި ބޮޑު ކަމަށް ވިދާޅުވެ، ރައީސް ޔާމީން ދާދި ފަހުން ސަރުކާރަށް ވަނީ ވަރަށް ބޮޑަށް ފާޑު ވިދާޅުވެފައެވެ.
Ads by STO
