އިންވެސްޓަރުން އެންމެ ބޮޑަށް އިންވެސްޓްކުރަން ބޭނުންވާ އެއް ޤައުމަކީ ރާއްޖެ: މައުސޫމް
އިންވެސްޓަރުން އެންމެ ބޮޑަށް އިންވެސްޓްކުރަން ބޭނުންވާ ޤައުމަށް ދިވެހިރާއްޖެ ވެއްޖެކަމަށް ޓޫރިޒަމް މިނިސްޓަރ ޑރ. ޢަބްދުﷲ މައުސޫމް ވިދާޅުވެއްޖެއެވެ.
މިނިސްޓަރ މިހެން ވިދާޅުވީ، މިއަހަރުގެ މޯލްޑިވްސް އެކައުންޓެންޓްސް ފޯރަމް ފެށުމުގެ ރަސްމިއްޔާތުގައި ވާހަކަދައްކަވަމުންނެވެ.
މިނިސްޓަރ ވިދާޅުވީ ރާއްޖެއިން ބޭރުގެ ކުންފުނިތަކުން ރާއްޖެ އައިސް އިންވެސްޓްކުރުމަށް ބާރުއަޅަންޖެހޭ ކަމަށެވެ. އަދި ފަތުރުވެރިކަމުގެ ސިނާއަތުގެ ޤާނޫނުތަކާއި ޤަވައިދުތައް އިންވެސްޓަރުންނަށް ފަހިވާނެގޮތައް ބައްޓަންކޮށްދިނުމަށް މަޖިލީހުން ގިނަ މަސައްކަތްތަކެއް ކޮށްދެއްވާފައިވާ ކަމަށް މިނިސްޓަރ ފާހަގަކުރެއްވިއެވެ.
މިނިސްޓަރ ވިދާޅުވީ، ދެމެހެއްޓެނިވި ގޮތެއްގައި ތިމާވެށި، އިޖްތިމާއީ އަދި ހިންގުމުގެ ދާއިރާގެ ކަންކަން ކުރިއެރުވުމުގައި އެކައުންޓެންޓުން މުހިންމު ދައުރެއް އަދާކުރާކަމަށެވެ.
އަދި ރާއްޖޭގެ އެހެން ސިނާއަތްތަކެކޭ އެއްފަދައިން އެކައުންޓިން ދާއިރާއަށްވެސް އިންސާނީ ވަސީލަތް މިހާރަށްވުރެ ބޮޑަށް ބޭނުންވާކަމަށް މިނިސްޓަރ ވިދާޅުވިއެވެ.
